O‘zbekiston delegatsiyasi Belarusga jo‘nab ketdi

2018 yilning 9-15 avgust kunlari O‘zbekiston delegatsiyasi Belarus Respublikasida tashrif bilan bo‘ladi, deb xabar qilmoqda TIV axborot xizmati.

Vazirlik va idoralar, Qoraqalpog‘iston Vazirlar kengashi, viloyatlar va Toshkent shahri hokimliklari, korxona va tashkilotlar rahbarlaridan tarkib topgan O‘zbekistonning nufuzli delegatsiyasi Minsk shahri va Belarusning boshqa mintaqalariga tashrif buyuradi, sanoat va qishloq xo‘jaligi kompaniyalarini borib ko‘radi, ilg‘or texnologiyalarga asoslangan ishlab chiqarish jarayoni bilan bevosita tanishadi.

Delegatsiya tashrifidan ko‘zlangan asosiy maqsad – O‘zbekiston va Belarus savdo-iqtisodiy hamkorligini kengaytirish uchun ikki davlat hududlari o‘rtasida to‘g‘ridan-to‘g‘ri aloqalarni o‘rnatish.