Ixtisoslashgan tashkilotlar davlat xaridlarida yordam beradi

Davlat xaridlarini o‘tkazish bo‘yicha xizmatlarni  ko‘rsatish huquqiga ega bo‘lgan ixtisoslashgan tashkilotlar to‘g‘risidagi nizom tasdiqlandi, deb yozmoqda Norma.
 
Ixtisoslashgan tashkilot – belgilangan talablarga muvofiq keladigan, davlat buyurtmachilariga davlat xaridini o‘tkazishni tashkil etish bo‘yicha pullik xizmatlar ko‘rsatadigan yuridik shaxs.
 
Masalan, u tovar (ish, xizmat)larning boshlang‘ich narxini belgilaydi,  marketing va boshqa tadqiqotlarni o‘tkazadi, reklama ishlarini tashkil etadi, xabarnomalarni, e'lon matnlarini va xarid hujjatlarini, shartnomalar loyihalarini rasmiylashtirish bilan shug‘ullanadi, xarid tartib-taomilini tashkil etishda ishtirok etadi va h.k. Ixtisoslashgan tashkilot o‘zi tashkilotchi bo‘lgan xarid qilish tartib-taomili ishtirokchisi sifatida ishtirok eta olmaydi.
 
Ixtisoslashgan tashkilotlarni tanlash davlat buyurtmachisi tomonidan alohida ro‘yxatda mavjud bo‘lgan ixtisoslashgan tashkilotlar orasidan tanlov asosida amalga oshiriladi. U LBMA saytida e'lon qilinadi va har oyda yangilanadi.
 
Bu ro‘yxatga kirish uchun ixtisoslashgan tashkilot quyidagi talablarga muvofiq kelishi kerak:

• O‘zbekistonda ro‘yxatdan o‘tkazilgan yuridik shaxs bo‘lishi;
• Ta'sischilar orasida davlat xaridi sub'yekti: davlat buyurtmachisi,  xarid tartib-taomili ishtirokchisi, davlat xaridlarining ijrochisi, xarid komissiyasi, maxsus axborot portali operatori yoki ekspert bo‘lmasligi;
• ta'sischilar jumlasida offshor hududda ro‘yxatdan o‘tkazilgan kompaniyalarning mavjud emasligi;
• shtatida xizmat ko‘rsatish bo‘yicha amaliy tajribaga ega bo‘lgan bir nafardan kam bo‘lmagan xodimga ega bo‘lishi;
• maxsus axborot portaliga ulanish imkonini ta'minlovchi dasturiy texnik qurilmaga ega bo‘lishi.
 
Sanab o‘tilgan mezonlarga muvofiq keladigan tashkilot ro‘yxatga kiritish to‘g‘risidagi ariza (tasdiqlangan shakl bo‘yicha) bilan LBMAga murojaat qilishi mumkin. Murojaat 5 kalendar kuni davomida ko‘rib chiqiladi.
 
Hujjat 20.08.2018 yildan kuchga kirdi.