Bojxonachilar “yashil” yo‘lak orqali ov quroli gilzalarini olib kirishga bo‘lgan urinishni fosh qilishdi

“Samarqand aeroporti” chegara bojxona posti xodimlari qurol-yarog‘ va o‘q-dorilarning bojxona chegarasi orqali noqonuniy ravishda olib o‘tilishiga doir navbatdagi bojxona qoidabuzarligini fosh etishdi. Bu haqda Kun.uz’ga Davlat bojxona qo‘mitasi axborot xizmati xabar berdi.

“Samarqand” xalqaro aeroportiga “Domodedovo-Samarqand” yo‘nalishidagi aviareys bilan uchib kelgan fuqaro J.B. “yashil” yo‘lak orqali bojxona nazoratidan o‘tayotganida uning bezovtalanishi bojxonachilarning diqqatini tortdi. Shundan so‘ng, unga tegishli bo‘lgan sumka xolislar ishtirokida tekshirilganda, sumkada jami 50 dona 16 mm kalibrli ov quroli gilzalarini yashirib o‘tilayotganligi aniqlandi.

Unga nisbatan bojxona xodimlari tomonidan ma'muriy huquqbuzarlik to‘g‘risidagi bayonnoma rasmiylashtirildi.

Sud qaroriga ko‘ra, ushbu shaxs O‘zbekiston Respublikasi Ma'muriy javobgarlik to‘g‘risidagi kodeksning 227^-19-moddasi 1-qismida ko‘rsatilgan ma'muriy huquqbuzarlikni sodir etganlikda aybdor deb topilib, unga nisbatan eng kam oylik ish haqining uch baravari miqdorida jarima jazosi tayinladi hamda ov quroli gilzalarini davlat foydasiga musodara qildi.

Yil boshidan Samarqand viloyati bojxona boshqarmasi xodimlari tomonidan jami 158 ta gilzalarning noqonuniy olib kirilishga chek qo‘yilgan.

Hozirda ushbu holat yuzasidan bojxona tekshiruvlari davom ettirilmoqda.