O‘zbekiston Respublikasi prezidenti “O‘zbekiston Respublikasida pasport tizimi to‘g‘risidagi nizomga o‘zgartish va qo‘shimchalar kiritish haqida”gi farmonni imzoladi.
Hujjat bilan O‘zbekiston Respublikasida pasport tizimi to‘g‘risidagi nizom quyidagi mazmundagi 3-bo‘lim bilan to‘ldirildi:
«3. Yo‘qotilgan pasport o‘rniga pasport berish
351. Fuqaro pasportini ehtiyot qilib saqlashi shart.
Pasportini yo‘qotib qo‘ygan fuqaro zudlik bilan doimiy ro‘yxatda turgan joyidagi ma'lumotlarni yig‘ish punktiga xabar berishi lozim, qonun hujjatlarida nazarda tutilgan tartib-taomillar o‘tkazilganidan keyin unga ushbu Nizomda nazarda tutilgan tartibda yangi pasport beriladi.
Vaqtincha xorijda bo‘lgan fuqarolar pasportini yo‘qotgan, pasporti yaroqsiz holga kelgan yoki uning amal qilish muddati tugagan hollarda O‘zbekiston Respublikasiga qaytish guvohnomasini olish uchun O‘zbekiston Respublikasining konsullik muassasasiga murojaat etadilar.
352. O‘zbekiston Respublikasi fuqarolari, chet el fuqarolari va fuqaroligi bo‘lmagan shaxslarning pasportini yoki shaxsni tasdiqlovchi boshqa hujjatini yo‘qotganliklari haqidagi arizalari bo‘yicha ichki ishlar organlari tomonidan tegishincha mazkur Nizomning 1 va 2-ilovalarga muvofiq belgilangan shakldagi ma'lumotnoma beriladi, ma'lumotnomaning orqa tomoniga doimiy yoki vaqtincha ro‘yxatda turganligi to‘g‘risida shtamp qo‘yilishi mumkin. Ma'lumotnoma ichki ishlar organlarining migratsiya va fuqarolikni rasmiylashtirish bo‘linmasi tomonidan beriladi.
Z53. Pasport yo‘qolganligi to‘g‘risidagi arizalar hisobga olish jurnalida O‘zbekiston Respublikasi Ichki ishlar vazirligi tomonidan o‘rnatilgan tartibda ro‘yxatga olinadi.
354. Respublikaning boshqa hududlaridan doimiy yashash joyiga kelgan va yangi yashash joyi bo‘yicha ro‘yxatga olingunga qadar pasportini yo‘qotib qo‘ygan O‘zbekiston Respublikasi fuqarolariga ularning arizalariga ko‘ra ichki ishlar organlari tomonidan pasport yo‘qolgani haqidagi ish ochiladi. Pasportlar fuqaro doimiy yashash maqsadida kelgan joydagi ichki ishlar organlari tomonidan ularni ro‘yxatga qo‘yish asoslari mavjud bo‘lgan taqdirda beriladi.
Yangi yashash joyi bo‘yicha ro‘yxatga olishga asoslar mavjud bo‘lmagan hollarda pasport olish to‘g‘risidagi ariza rad etiladi. Bunday hollarda pasport ro‘yxatdan chiqishni bekor qilgan holda fuqaroning oldingi ro‘yxatdan o‘tgan joyidagi yoki ro‘yxatga qo‘yishga asoslar mavjud bo‘lganda boshqa yangi ro‘yxatdan o‘tish joyidagi ichki ishlar organi tomonidan beriladi.
