Kaluga oblastidagi issiqxonada O‘zbekiston va Xitoydan kelgan 51 nafar noqonuniy migrant aniqlandi

Rossiyaning Kaluga oblasti Kolontay qishlog‘ida joylashgan issiqxona kompleksi mintaqa hududida noqonuniy migratsiya bilan kurashish bo‘yicha reyd obektlaridan biriga aylandi.

Ma'lumotlarga ko‘ra, huquq tartibot idoralari xodimlari u yerda Xitoy va O‘zbekistondan bo‘lgan 51 nafar noqonuniy migrantni aniqlashgan. Chet elliklar issiqxonada ishlab, pomidor va bodring yetishtirishgan.

«Tekshiruv natijalariga ko‘ra, huquq-tartibot idoralari xodimlari migratsiya sohasida 84ta ma'muriy huquqbuzarlikni qayd etdilar. Mintaqaga kelgan mehmonlar har bir qoidabuzarlik uchun 2000 rubl miqdorida jarimaga tortildi. 17 nafar chet el fuqarosi sud qaroriga binoan mamlakatdan majburan chiqarib yuborildi, keyinchalik ular 5 yilgacha kira olmaydi. Ikki yoki undan ko‘p ma'muriy qoidabuzarlik sodir etganlar kelgusi 3 yil mobaynida bizning mamlakatimizga kira olmaydilar. Ish beruvchi har bir chet el fuqarosi uchun 250 dan 800 ming rublgacha jarimaga tortilishi mumkin», - deb xabar qiladi Rossiya Ichki ishlar vazirligining Kaluga oblasti bo‘yicha boshqarmasi matbuot xizmati.