Hasanboy Do‘smatov vazn toifasini o‘zgartiradi

O‘zbekiston boks jamoasi yetakchisi, Rio Olimpiadasi chempioni, Osiyo chempioni va Osiyo o‘yinlari kumush medali sovrindori Hasanboy Do‘smatov final jangidan keyin «Kun.uz» muxbiriga intervyu berdi.

U finaldagi raqibi va kelajak rejalari haqidagi fikrlarni bildirib o‘tgan.

«O‘zbekiston xalqini mustaqillik bayramining 27 yilligi bilan tabriklayman.

Turnirda barchamiz bor kuchimiz bilan harakat qildik. Bugun olgan kumush medalimni Tokio Olimpiadasida oltin medalga aylantirishga va'da beraman.

Amit bilan avval ikki marta jang qilganman, 2017 yili Osiyo chempionatida va jahon chempionatida. Ikki safar ham yutgandim. U o‘z ustida ishlagani ko‘rinib turibdi.

Men bu musobaqaga kelishdan oldin 56 kg vazn toifasini 49 kg vaznga tushirdim. Bu ancha qiyin bo‘ldi. Endi 52 kilogrammgacha bo‘lgan vaznda ishtirok etmoqchiman. Kelajakda musobaqalarda 10 vazn toifasida emas, 8 vazn toifasida bahslar o‘tkazilishi mumkin. Bu holda boshqalar ham vaznini o‘zgartiradi», degan Hasanboy Do‘smatov.

Ma'lumot uchun, ayni vaqtda O‘zbekiston jamoasi sharafini -52 kg vazn toifasida Jasurbek Latipov himoya qiladi. U Osiyo o‘yinlari finalida g‘olib chiqib, oltin medalni qo‘lga kiritdi.