O‘zbekiston delegatsiyasi Jakartadan maxsus reys bilan vatanga qaytmoqda (foto)

Bugun, 2 sentabr kuni Indoneziyada o‘tgan 18-Osiyo o‘yinlari o‘z nihoyasiga yetdi. Unda qatnashgan O‘zbekiston olimpiachilari sportning turli yo‘nalishlarida bahs olib borishdi va munosib natijalarni qayd etishdi.

Shu munosabat bilan sportchilarga qulaylik yaratish maqsadida O‘zbekiston hukumati tomonidan Boeing 787-8 Dreamliner samolyotida maxsus charter reysi yo‘lga qo‘yildi. U 200 nafarga yaqin asosiy delegatsiyani Jakartadan to‘g‘ri Toshkentga kelishini ta'minlaydi. Bundan tashqari, "O‘zbekiston havo yo‘llari" MAK tomonidan sportchilarning g‘alabasiga bag‘ishlab tort tayyorlandi. O‘zbekistonlik sportchilar Toshkent vaqti bilan 15:00-16:00 atrofida vatanga yetib kelishlari kutilmoqda.

Ma'lumot o‘rnida: 18-Osiyo o‘yinlarida O‘zbekistondan 234 nafar sportchi qatnashdi. Musobaqa yakunida O‘zbekiston delegatsiyasi 21 oltin, 24 kumush va 25 bronza, jami 70 medal qo‘lga kiritdi. Sportchilarimiz eng ko‘p medalni Osiyo o‘yinlariga ilk bor kiritilgan o‘zbek milliy kurashi vakillari keltirishdi - 6ta oltin, 2ta kumush va 4ta bronza. Shuningdek, boksda 5ta oltin va 2ta kumush medal qo‘lga kiritildi. Qayd etish kerakki, turnirga borgan barcha bokschilar finalga chiqib, medallarga ega bo‘lishdi. 

Musobaqa davomida o‘zbekistonliklar Osiyo o‘yinlari rekordlarini yangilashdi. Svetlana Radzivil balandlikka sakrash bo‘yicha uch karra Osiyo o‘yinlari g‘olibiga aylanish bilan bir qatorda, 2010 yilda o‘zi o‘rnatgan rekordni yangilay oldi. Shuningdek, Ruslan Nuriddinov og‘ir atletika bo‘yicha Osiyo o‘yinlarining yangi rekordchisiga aylandi. Vadim Menkov baydarka va kanoeda eshkak eshish bo‘yicha to‘rt karra Osiyo o‘yinlari g‘olibiga aylangan ilk sportchi bo‘ldi. 

Yakuniy reytingda xitoylik sportchilar jami 289 medal olgan holda boshqa raqiblardan yaqqol ustunlik qilishdi - 132ta oltin, 92ta kumush va 65 bronza. Uchlikni Yaponiya (74-56-74) va Janubiy Koreya (49-57-7) to‘ldirdi. Mezbon Indoneziya esa 31 oltin olib, to‘rtinchi o‘rinni band etdi, mezbonlarning 15 oltini milliy sport turi penchak silatdan olindi. O‘zbekiston 5-o‘ringa ega bo‘ldi.