12:59 / 12.09.2018
7531

Bojxona kodeksi yangi qoidalar bilan to‘ldirilmoqda

Foto: senat.uz

2018 yil 11 sentabr kuni O‘zbekiston Respublikasi Oliy Majlisi Senati Byudjyet va iqtisodiy islohotlar masalalari qo‘mitasi ishchi guruhining “Iqtisodiy munosabatlar va tadbirkorlik rivojlantirilishiga qaratilgan O‘zbekiston Respublikasining ayrim qonun hujjatlariga o‘zgartish va qo‘shimchalar kiritish to‘g‘risida”gi O‘zbekiston Respublikasi Qonunini muhokama etishga bag‘ishlangan yig‘ilishi bo‘lib o‘tdi.

O‘zbekiston Respublikasi Oliy Majlisi Senatining axborot xizmati xabariga ko‘ra, O‘zbekiston Respublikasi Oliy Majlisi Qonunchilik palatasi tomonidan 2018 yil 30 avgust kuni qabul qilingan mazkur Qonunning maqsadi iqtisodiy munosabatlar va tadbirkorlik faoliyatini tartibga soladigan qonun hujjatlarini yanada takomillashtirishdan iborat.  

Jumladan, Qonunda “Banklar va bank faoliyati to‘g‘risida”gi O‘zbekiston Respublikasi Qonuniga banklar tomonidan mikroqarz berish normasini mustahkamlovchi qo‘shimcha kiritish nazarda tutilmoqda.

Bundan tashqari, “Mikromoliyalash to‘g‘risida”gi va “Mikrokredit tashkilotlari to‘g‘risida”gi O‘zbekiston Respublikasi qonunlari yangi norma bilan to‘ldirilmoqda. Unga ko‘ra, mikromoliyaviy xizmatlar ko‘rsatish shartnomalari bo‘yicha yillik qarz miqdorining yarmidan ko‘pini tashkil etadigan summada foizlar hisoblash, vositachilik haqlari va neustoyka (jarima, penya) undirish, javobgarlikning boshqa choralarini qo‘llash taqiqlanadi.

Shuningdek, litsenziya talab qiladigan faoliyat turlari toifasidan ayrim faoliyat turlarini hamda tegishli litsenziyalanadigan faoliyat turlari nomlarining bir qismini chiqarib tashlash nazarda tutilmoqda.

O‘zbekiston Respublikasi Bojxona kodeksining 275-moddasi yangi qoidalar bilan to‘ldirilmoqda. Ularga muvofiq deklarant bojxona rasmiylashtiruvi bo‘yicha operatsiyalarni bajarish uchun bojxona nazorati zonasiga kirish, bojxona masalalari bo‘yicha bojxona organlaridan axborot va maslahatlar olish, tovarlarni va (yoki) transport vositalarini bojxona hududidan olib chiqish niyati to‘g‘risida bojxona organlarini xabardor qilish, dastlabki operatsiyalar amalga oshirilayotganda bojxona maqsadlari uchun zarur bo‘ladigan hujjatlarning loyihalarini tayyorlash, deklaratsiyalanadigan tovarlarni va (yoki) transport vositalarini bojxona omborlariga bojxona nazorati ostida joylashtirish huquqiga ega bo‘ladi.

Shu bilan birga, vakil qilgan shaxs oldidagi majburiyatni ta'minlash maqsadida bojxona brokerining deklarant yoki vakolatli shaxs oldidagi o‘z fuqarolik javobgarligini eng kam oylik ish haqining ming baravari miqdorida sug‘urtalash majburiyati mustahkamlanmoqda, chunki nazarda tutilgan majburiyatlarning yo‘qligi bojxona brokerlari xizmatlaridan foydalanishga qaror qilgan ishtirokchi deklarantlar uchun xavf paydo bo‘lishiga olib kelishi mumkin.

Top