Google Tramp migratsiya siyosatiga xalaqit bermoqchi bo‘lgan - WSJ

2017 yilda Google korporatsiyasi xodimlari o‘z qidiruv tizimi algoritmlariga aralashuvni muhokama qilishgan, bu AQSh prezidenti Donald Trampning migratsiya siyosatiga salbiy ta'sir ko‘rsatish maqsadida amalga oshirilgan. Bu haqda The Wall Street Journal gazetasi ichki korporativ pochtaga asosan yozmoqda.

Ta'kidlanishicha, Google xodimlari 2017 yilning yanvar oyida Tramp «Qo‘shma Shtatlarga xorijiy terrorchilarning kirib kelishidan millatni himoya qilish» farmonini imzolaganidan bir necha kun o‘tib, qidiruv algoritmlariga aralashuv masalasini muhokama etishgan. Bu hujjat migrantlarga nisbatan qattiq choralarni joriy qildi, jumladan, qator davlatlardan musulmonlarning kirishi butunlay taqiqlandi.

Google xodimlari o‘z qidiruv tizimi ishini o‘zgartirib, u migratsiyaga oid masalalar bilan shug‘ullanuvchi tashkilotlar va davlat idoralariga havolalarni foydalanuvchilarga ko‘proq ko‘rsatishini xohlashgan. 

Shuningdek, ular qidiruv tizimiga avvaldan tayyorlab qo‘yilgan natijalarni ko‘rsatish majburiyatini yuklamoqchi bo‘lishgan, bunda foydalanuvchilarning Tramp migratsiya siyosatiga aloqador bo‘lgan so‘zlar bo‘yicha ma'lumot izlashi yetarli edi. Ular orasida «islom», «musulmon», «Meksika», «Eron» va boshqa so‘zlar bor.

O‘z navbatida, korporatsiya vakilining ma'lum qilishicha, xodimlar maktublaridagi g‘oyalar hech qachon amalda qo‘llanilmagan.

«Google qidiruv tizimi orqali hech qachon manipulyatsiya qilmagan», - deya ta'kidlanadi bayonotda.

Eslatib o‘tamiz, avvalroq Google foydalanuvchilar xatlaridan ma'lumot to‘plash imkonini yaratgani haqida xabar berilgandi.