Qirg‘iziston prezidenti soxta «qarindoshlarini» jazolashga va'da berdi

Qirg‘iziston prezidenti Sooronbay Jeenbekov 21 sentabr kuni Kemin tumaniga qilgan amaliy tashrifi chog‘ida Qirg‘izistonda oilaviy boshqaruvga yo‘l qo‘yib bo‘lmasligi haqida yana bir bor ma'lum qildi. U prezidentning nomidan foydalanib ish qilayotganlarni javobgarlikka tortish haqidagi o‘z topshirig‘i haqida gapirdi, deb yozmoqda kazakbol.com.

«Jeenbekov Bakiyevga aylangani, uning qarindoshlari davlatni boshqarayotgani haqida atayin yolg‘on mish-mishlar tarqatilmoqda. Men hech kimni boshqaruvga yaqinlashtirmayapman. Agar bilib qolsam, qattiq choralar ko‘raman. Bu haqda hamma biladi. Ammo hozirda mening «qarindoshlarim», «do‘stlarim» ko‘payib ketgan. Go‘yoki mening qarindoshlarimdek o‘zini ko‘rsatib, ishga joylashishmoqda. Men bunday holatlarda hibsga olish kerakligini aytdim. Men uchun sobiq prezidentlarning tajribasi katta saboqdir. O‘g‘lim va qizim bor. O‘g‘lim 4-sinfda o‘qiydi. U Maksim Bakiyevning yoshiga yetgunicha, men lavozimdan ketaman. Mening maqsadim - xalq orasida bo‘lish va prezidentlik lavozimini tinchlik bilan topshirish», - dedi u.

Prezident bundan avval ham Qirg‘izistonda oila va tanish-bilishchilik boshqaruviga yo‘l qo‘yilmasligi haqida gapirgan.

«Biz butun dunyoga yana bir bor ko‘rsatdikki, Qirg‘iziston xalqi adolat g‘oyalarini hurmat qiladi, hech qachon tiz cho‘kmaydi va oila hamda tanish-bilishchilik boshqaruviga toqat qilmaydi, - dedi u. - Hokimiyatni egallab olish, xalq mol-mulkini o‘zlashtirish va odamlarni xor qilmoqchi bo‘lganlarga munosib javob berildi».