Ostonada xalqaro adabiy forum bo‘lib o‘tmoqda 

Qozog‘iston poytaxti Ostona shahrida 20–21 sentabr kunlari «Hozirgi zamon so‘z energiyasi» deb atalgan adabiy forum bo‘lib o‘tmoqda, deb xabar berdi Kun.uz muxbiri.

Turli davlatlardan kelgan shoirlar, yozuvchilar, adabiyotshunoslar ishtirok etayotgan adabiy anjumanda zamonaviy adabiyotga doir muammolar, umuminsoniy muammolarni hal etishda adabiyotning o‘rni, adabiy aloqalarni kuchaytirish kabi masalalar yuzasidan fikr almashilmoqda. 

Forumda qatnashayotgan O‘zbekiston Yozuvchilar uyushmasi raisi o‘rinbosari Nodir Jonuzoq, Qoraqalpog‘iston Yozuvchilar uyushmasi raisi Kenges Karimovlar bugun dunyoda ijod ahlini bezovta qilib turgan muammolar yechimi haqida gapirarkan, mamlakatimizda ijodkorlarga ko‘rsatilayotgan yuksak e'tiborni namuna qilib ko‘rsatdilar. 

Mezbonlar safida O‘ljas Sulaymonov, Muxtor Shoxonov kabi dongdor adiblarning borligi forumga o‘zgacha ruh bag‘ishlayapti. 

Eslatib o‘tamiz, shu yilning 7–8 avgust kunlari Toshkent shahrida xalqaro adabiy anjuman bo‘lib o‘tgandi.