Trampdan BMT Bosh assambleyasida shou kutishmayapti

AQSh prezidenti Donald Trampdan, uning oldindan taxmin qilish mushkul bo‘lgan xarakteriga qaramay, BMT Xavfsizlik kengashidagi raisligi vaqtida shou kutishmayapti, deya ta'kidlaydi Reuters agentligi.

26 sentabr, chorshanba kuni Tramp Nyu-Yorkda BMT Xavfsizlik kengashining Eronga alohida e'tibor beriladigan, kimyoviy va yadroviy qurolini tarqatmaslik masalalari bo‘yicha yig‘ilishga rahbarlik qilishi kutilyapti.

«Mening ishonchim komilki, bu voqea butun o‘tgan vaqt davomida Xavfsizlik kengashining eng mashhur yig‘ilishi bo‘ladi», - deya aytib o‘tdi AQShning BMTdagi doimiy vakili Nikki Xeyli.

Shunga qaramay, Trampning avvaldan taxmin qilish mushkul bo‘lgan xarakteriga qaramasdan, ba'zi diplomatlar Amerika rahbari Xavfsizlik kengashi yig‘ilishida realiti-shou uyushtirishini kutishmayapti, deyiladi materialda.

«Men bu ko‘ngilochar tadbirga o‘xshab ketadi, deb o‘ylamayman», - deya aytib o‘tdi BMTning o‘z nomini oshkor etmagan yuqori mansabli diplomati.

Diplomatning so‘zlariga ko‘ra, hatto AQSh prezidentini yoqtirmaydigan davlatlar rahbarlari ham buni ochiqdan-ochiq ko‘rsatishmaydi.

Agentlikning ta'kidlashicha, Amerika Qo‘shma Shtatlari prezidenti lavozimini Trampdan oldin egallagan Barak Obama 2009 va 2014 yillarda Xavfsizlik kengashi yig‘ilishlarida raislik qilgan. Har ikki holatda ham Kengash muhokamada ishtirok etgan masalalar yuzasidan rezolyutsiyalar qabul qilgan. Shu bilan birga, AQShning BMTdagi doimiy vakili Nikki Xeyli so‘zlariga ko‘ra, Tramp chorshanba kungi yig‘ilishda rezolyutsiya qabul qilishni rejalashtirmayapti.

Reuters’ning qo‘shimcha qilishicha, Xavfsizlik kengashining raisi o‘rni odatda ma'muriy va xolis xarakterga ega bo‘ladi.

Eslatib o‘tamiz, avvalroq Tramp BMT Bosh assambleyasi doirasida kimlar bilan uchrashishi ma'lum bo‘lgandi.