«Chelsi» xo‘jayini Roman Abramovich klubni kamida 3 milliard funt sterlingga pullashni mo‘ljallagan. Bu haqda Bloomberg agentligi muzokaralardan xabardor manbasiga asoslangan holda xabar tarqatgan.
Bundan avvalroq Abramovich buyuk britaniyalik milliarder Jim Retkliff tomonidan taklif etilgan 2 milliard funtni rad qilgani xabar qilingandi.
Bloomberg talqiniga ko‘ra, rossiyalik biznesmen «Chelsi»ni Amerikaning ehtimoliy sanksiyalari tufayli sotmoqchi.
Yozda Sunday Times nashrida Abramovich «Chelsi»ni sotish imkoniyatlarini o‘rganib chiqishi uchun investitsion bankni yollagani haqida xabar paydo bo‘lgandi. Keyinroq klubdagilar bu ma'lumotni rad etishdi.
Abramovich «Chelsi»ni 2003 yili 140 million funtga xarid qilgandi. O‘tgan vaqt mobaynida London klubi 5 marta Angliya chempionatida g‘olib bo‘ldi, 5 marta Angliya Kubogini qo‘lga kiritdi va 2 marta Angliya Superkubogiga ega chiqdi. Shuningdek, jamoa 3 marta Angliya ligasi Kubogi, bir martadan Chempionlar Ligasi va Yevropa Ligasida chempion bo‘ldi (jami 17ta sovrin).
Taqqoslash uchun, 2003 yilgacha, 98 yil mobaynida klub faqat 9 sovrin yutgandi: bir marta Angliya chempionligi, 3 Angliya Kubogi, 2 Angliya Superkubogi, 2 Angliya Ligasi Kubogi va bir UYeFA Superkubogi.
