Yaponiyaning Okinava prefekturasi yangi gubernatori AQSh bazalarining olib chiqilishi tarafdori bo‘lishi mumkin

Yaponiyaning Okinava prefekturasi gubernatori saylovlarida muxolifatchi va AQSh harbiy bazalarining prefektura tashqarisiga olib chiqilishi tarafdori Denni Tamaki yetakchilik qilmoqda. Bundan “Kiodo” axborot agentligi va NHK telekanali o‘tkazgan ekzit-poll natijalari darak bermoqda. Ularga ko‘ra, Tamaki katta ehtimol bilan prefektura gubernatori bo‘lishi mumkinligi kelib chiqmoqda.

Okinava gubernatori saylovlari 30 sentabrda bo‘lib o‘tdi. Prefekturaning yangi gubernatorini saylash zarurati sobiq gubernatorning avgust oyida vafot etgani bilan bog‘langan. Tamaki avvalgi gubernatorning AQSh bazalarining olib chiqilishi borasidagi siyosatini davom ettirishini aytgan, bu esa Yaponiya markaziy hukumati pozitsiyasiga zid keladi.

Okinava hududi Yaponiyaning bor-yo‘g‘i 0,6 foizini tashkil qilsa-da, u yerda AQShning Yaponiyadagi harbiy obektlarining 74 foizi va harbiylarining yarmidan ko‘pi joylashgan. Prefektura ma'muriyati ma'lumotlariga ko‘ra, Okinavada 22,5 ming amerikalik harbiy hamda ular oilalarining 19 ming a'zosi va boshqa amerikaliklar bor.