Avgust oyi boshida Shimoliy Koreya hukumati o‘zining asosiy raketa poligonini buzish bo‘yicha ishlarni to‘xtatib qo‘ygan. Bu haqda «Ryonxap» agentligi Jon Xopkins nomidagi universitet huzurida faoliyat yurituvchi 38 North tahlil markazi tadqiqotiga asosan xabar bermoqda.
Iyul oyi oxirida ushbu tadqiqot guruhi Shimoliy Koreya raketa dvigatellari sinovdan o‘tkazilgan Soxe poligonidagi asosiy obektlarni buzish ishlariga kirishgani haqida xabar qilgandi.
Markaz mutaxassislari 27 sentabr kungi sun'iy yo‘ldosh suratlariga asoslanib, buzish ishlari to‘xtatilgani haqidagi xulosaga kelishdi.
Ekspertlarning fikriga ko‘ra, poligonni buzish ishlaridagi past faollik turli sabablarga bog‘liq bo‘lishi mumkin. Ularning orasida - xalqaro kuzatuvchilarning obektga tashrif buyurishiga tayyorgarlik ko‘rish. Bundan tashqari, markaz 7 oktabr AQSh davlat kotibi Mayk Pompeoning KXDRga ikkinchi tashrifidan keyin poligon yo‘q qilinishi mumkinligini ham istisno etmagan.
Eslatib o‘tamiz, avvalroq KXDR qancha yadro quroliga egaligi aytilgandi.
