Lisenziyalash: qanday o‘zgartirishlar kiritildi?

Amalga oshirilishi uchun litsenziyalar talab qilinadigan faoliyat turlarining ro‘yxatiga (keyingi o‘rinlarda – Ro‘yxat) o‘zgartirishlar kiritildi.

Eslatib o‘tamiz, aprel oyida davlat rahbari tomonidan 7ta litsenziyalanadigan faoliyat turini bekor qilish to‘g‘risidagi taklif qabul qilindi. Biroq rasmiy-yuridik nuqtai nazardan qaraladigan bo‘lsa, u yoki bu litsenziyalar faqat Ro‘yxatga o‘zgartirishlar kiritilgandan keyin bekor qilingan deb hisoblanadi, chunki ushbu ro‘yxat Qonun bilan tasdiqlangan, deb yozadi Norma.
 
Shu munosabat bilan Ro‘yxatdan quyidagilar chiqarib tashlandi:

• aeroportlardagi tashish ishlarini bajaruvchi havo kemalariga xizmat ko‘rsatish faoliyati;
• tamaki xom ashyosini fermentlash;
• audiovizual asarlarni tayyorlash, dublyaj qilish va ekranda namoyish etish;
• audiovizual asarlarni, fonogrammalarni va EHM uchun yaratilgan dasturlarni realizatsiya qilish va prokatga berish.
 
Bundan tashqari, to‘rtta yo‘nalish – telekommunikatsiyalar tarmoqlarini loyihalashtirish, qurish, ulardan foydalanish va ularga xizmat ko‘rsatish – bitta pozitsiyaga birlashtirildi. Ilgari har biri bo‘yicha alohida hujjat talab etilgan bo‘lsa, endi ular bo‘yicha litsenziya umumiy bo‘ladi.
 
Shu tariqa, kiritilgan o‘zgartirishlar natijasida litsenziyalanadigan faoliyat turlarining umumiy soni 60 ta pozitsiyadan 55 tagacha qisqartirildi.
 
Qayd etilishicha, kiritilgan o‘zgartirish va qo‘shimchalar tahlili quyidagilarni ko‘rsatdi.
 
Birinchidan, prezidentning 11.04.2018 yildagi PF–5409-son farmoniga 1-ilovada quyidagi faoliyat turlariga litsenziya berilishini bekor qilish nazarda tutilgan:

• ko‘chmas mulk bozorida axborot va maslahat xizmatlarini ko‘rsatish;
• dori vositalari va tibbiy buyumlarni yaratish bo‘yicha ilmiy-tadqiqot ishlari, shuningdek ularning sifatini nazorat qilish;
• neft mahsulotlarini AYoQSh va moy almashtirish punktlari orqali sotish.
 
Biroq Ro‘yxatga kiritilgan tuzatishlarda bular nazarda tutilmagan. Bundan tashqari, 3.10.2018  yildagi O‘RQ–494-son Qonun bilan «Rieltorlik faoliyati to‘g‘risida»gi va «Dori vositalari va farmatsevtika faoliyati to‘g‘risida»gi qonunlarga o‘zgartirishlar kiritilmagan (keyingisi bo‘yicha tegishli loyiha ishlangan edi).
 
Sanab o‘tilgan faoliyat turlariga litsenziyalarning bekor qilinishi deputatlar tomonidan ma'qullanmagan bo‘lishi, lekin keyinchalik qonun hujjatlariga tegishli o‘zgartirishlar kiritilishi mumkin.
 
Ikkinchidan, 2018 yilning 1 oktabridan kripto-aktivlar aylanmasi sohasidagi, jumladan kripto-birjalar yaratish faoliyati litsenziyalanishi joriy qilindi. Biroq mazkur faoliyat turi hali Ro‘yxatga kiritilmagan.
 
O‘zgartirishlar 4.10.2018 yildan kuchga kirdi.