Armanistonlik aktyor, qiziqchi va shoumen Ayk Marutyan Yerevan shahri hokimi lavozimini egalladi. Bu haqda «Sputnik Armaniston» xabar bermoqda.
10 oktabr kuni ertalab Armaniston poytaxtining yangi saylangan Oqsoqollar kengashining birinchi yig‘ilishi bo‘lib o‘tdi. Unda o‘zining birinchi ish kunida shahar yangi hokimi ham qatnashdi.
«Biz barcha yerevanliklar orzularini ro‘yobga chiqarish uchun tarixiy imkoniyatga egamiz. Biz fuqarolarimiz har daqiqa, har soniya, har kuni tabassum qilishi uchun qo‘limizdan kelgan barchasini qilamiz», - deya va'da berdi Marutyan.
U kengashning barcha a'zolarini, qaysi partiyaga aloqador ekanligidan qat'i nazar, birga ishlashga chaqirdi.
Marutyanning inauguratsiya marosimi 13 oktabr kuni bo‘lib o‘tadi.
Eslatib o‘tamiz, avvalroq Armaniston deputatlari navbatdan tashqari parlament saylovlarini qo‘llab-quvvatlashgani xabar berilgandi.
