O‘zbekiston Respublikasi prezidenti «O‘zbekiston Respublikasining ayrim qonun hujjatlariga odil sudlovni amalga oshirish samaradorligini yanada kuchaytirishga qaratilgan o‘zgartish va qo‘shimchalar kiritish, shuningdek «Fuqarolarning huquqlari va erkinliklarini buzadigan xatti-harakatlar va qarorlar ustidan sudga shikoyat qilish to‘g‘risida»gi O‘zbekiston Respublikasi Qonunini o‘z kuchini yo‘qotgan deb topish haqida»gi qonunni imzoladi. Bu haqda «Xalq so‘zi» xabar bermoqda.
Qonun Qonunchilik palatasi tomonidan 2018 yil 21 sentabrda qabul qilingan, Senat tomonidan 2018 yil 27 sentabrda ma'qullangan.
Hujjat bilan «Sudlar to‘g‘risida»gi 924–XII-sonli qonunga quyidagi o‘zgartishlar va qo‘shimcha kiritildi:
1) 27-moddaning birinchi qismi quyidagi tahrirda bayon etildi:
«O‘zbekiston Respublikasi Oliy sudi raisining birinchi o‘rinbosari, rais o‘rinbosarlari – sudlov hay'atlarining raislari:
O‘zbekiston Respublikasi Oliy sudi Rayosatidan tashqari barcha instansiya sudlarining hal qiluv qarorlari, hukmlari, ajrimlari va qarorlari ustidan protest kiritadi;
O‘zbekiston Respublikasi Oliy sudining tegishli sudlov hay'atlari ishiga rahbarlikni amalga oshiradi;
O‘zbekiston Respublikasi Oliy sudi Plenumiga sudlov hay'atlarining faoliyati to‘g‘risidagi ma'ruzalarni taqdim etadi;
O‘zbekiston Respublikasi Oliy sudining tegishli sudlov hay'atlari majlislarida raislik qiladi;
O‘zbekiston Respublikasi Oliy sudining tegishli sudlov hay'atlari majlislarida ishlarni ko‘rib chiqish uchun sudlov tarkiblarini shakllantiradi;
sud ishlarini nazorat tartibida tekshirish uchun talab qilib oladi;
tegishli quyi sudlarning faoliyatini tashkil etishga ko‘maklashadi;
sud amaliyotini umumlashtirish, sud statistikasini tahlil qilish bo‘yicha ishlarni tashkil etadi;
sudlar tomonidan chiqarilgan, o‘zlari protest kiritishga haqli bo‘lgan hal qiluv qarorlari, hukmlar, ajrimlar va qarorlar ijrosini to‘xtatib turadi;
sudyalar va sudning boshqa xodimlari malakasini oshirish ishini tashkil etadi;
vazifalar taqsimotiga muvofiq O‘zbekiston Respublikasi Oliy sudining tarkibiy bo‘linmalari ishiga rahbarlik qiladi;
fuqarolarni shaxsan qabul qiladi;
qonun hujjatlariga muvofiq boshqa vakolatlarni amalga oshiradi»;
2) 34-modda:
quyidagi mazmundagi beshinchi va oltinchi xatboshilar bilan to‘ldirildi:
«sud majlislarida raislik qiladi;
tegishli quyi sudlarning faoliyatini tashkil etishga ko‘maklashadi»;
beshinchi – o‘n ikkinchi xatboshilari tegishincha yettinchi – o‘n to‘rtinchi xatboshilar deb hisoblanadi;
3) 35-modda birinchi qismining uchinchi xatboshisidagi «raislik qilishi mumkin» degan so‘zlar «raislik qiladi» degan so‘zlar bilan almashtirildi;
4) 38-modda birinchi qismining ikkinchi xatboshisi quyidagi tahrirda bayon etildi:
«sud majlislarida raislik qiladi, sudyalar o‘rtasida ishlarni taqsimlaydi, shu jumladan avtomatlashtirilgan axborot tizimidan foydalangan holda taqsimlaydi».
