Nurmagomedov 50 cent’ni Dog‘istonga taklif qildi

Aralash yo‘nalish (MMA) bo‘yicha rossiyalik jangchi Habib Nurmagomedov unga Bellator’ga o‘tishni taklif qilgan rep-ijrochi Kertis Jyeksonga (50 cent) javob qaytardi.

Musiqachi UFC 229 musobaqasida Konor Makgregor ustidan qozonilgan g‘alabadan so‘ng yuz bergan mushtlashuv sababli rossiyalikka gonorar to‘lamayotgan UFC rahbariyatining xatti-harakatlarini qoralab chiqdi. 50 cent so‘zlariga ko‘ra, u Bellator’ga o‘tishi uchun Habibga 2 mln dollar to‘lashga tayyor.

«Agar haqiqiy erkaklar qayerda dunyoga kelishini ko‘rishni istasang, unda Dog‘istonga taklif qilaman. Men AQShda bo‘lganimda, senga xabar beraman. Senga qo‘llab-quvvatlov uchun rahmat, sen haqiqiy erkaksan», - deb yozdi Nurmagomedov tvitterdagi sahifasida.

Eslatib o‘tamiz, avvalroq Amerikalik mashhur rep ijrochi, 50 cent taxallusi ostida ijod qiluvchi Kertis Jyekson rossiyalik jangchi Habib Nurmagomedovning Mutlaq jangchilar chempionatidan (UFC) ehtimoliy ketishi haqida o‘z fikrini bildirgandi.