Turkiyada ozod etilgan pastor Branson AQShga qaytdi

Turkiyada ikki yil hibs ostida saqlangan Endryu Branson shanba kuni AQShga qaytib kelgan. Bu haqda Fox News telekanali xabar bermoqda.

Telekanalning xabariga ko‘ra, Branson mingan samolyot Vashington yaqinidagi Endryus harbiy bazasiga kelib qo‘ngan. Bungacha u AQShning Germaniyada joylashgan harbiy gospitalida vrachlar ko‘rigidan o‘tgan. AQSh prezidenti Donald Tramp ilgariroq shanba kuni Branson bilan Oq uyda uchrashishini e'lon qilgan edi. U shuningdek, ko‘rsatilgan yordam uchun Turkiya prezidenti Rajab Toyyib Erdo‘g‘anga minnatdorchilik izhor etgan.

12 oktabr kuni Izmir shahri sudi Bransonni uch yilu, bir yarim oyga ozodlikdan mahrum etish haqida hukm chiqargan, biroq uning hibs ostida o‘tkazgan kunlarni hisoblab chiqib, uy qamog‘idan ozod etgan. Sud Bransonga nisbatan qo‘llanilgan barcha ehtiyot choralarini bekor qilgan, jumladan, xorijiy davlatga chiqib ketish bo‘yicha taqiqni ham.