Prezident qarori loyihasi: jinoyat-ijroiya qonunchiligi tizimi tubdan takomillashtiriladi

Normativ-huquqiy hujjatlar loyihalari muhokamasi portalida “Jinoyat-ijroiya qonunchiligi tizimini tubdan takomillashtirish chora-tadbirlari to‘g‘risida”gi prezident qarori loyihasi joylashtirildi.

Hujjat bilan quyidagilar jinoyat-ijroiya qonunchiligini takomillashtirishning asosiy yo‘nalishlari va vazifalari etib belgilanadi:

jinoyat-ijroiya qonunchiligi normalarini unifikatsiya qilish, tizimlashtirish va uyg‘unlashtirish;

mahkumlarning huquqlariga so‘zsiz rioya etilishini, ularning sha'ni va qadr-qimmati hurmat qilinishini ta'minlash mexanizmlarini takomillashtirish;

mahkumlarda qonun talablariga va jamiyatdagi xulq-atvor qoidalariga rioya etish madaniyatini, bilim va ma'naviy-axloqiy saviyasini oshirishga intilishni shakllantirishga qaratilgan qayta tarbiyalash va axloqan tuzatish tizimini takomillashtirish;

mehnat bozorida talabga ega bo‘lgan kasblar bo‘yicha asosiy hunar va umumta'lim dasturlarini amalga oshirish doirasida mahkumlarni, xususan voyaga yetmagan va ma'lumotga ega bo‘lmaganlarni kasbiy tayyorlash va ularning bandligini ta'minlash tizimini takomillashtirish;

ozodlikdan mahrum qilish bilan bog‘liq bo‘lmagan jazolar ijrosi uchun mas'ul hisoblangan probatsiya xizmati faoliyatini yo‘lga qo‘yish orqali mazkur jazo turlariga hukm qilingan, shu jumladan shartli hukm qilingan mahkumlarni qayta tarbiyalash, ularning huquqlarini ta'minlash borasidagi ishlar samaradorligini oshirish;

fuqarolar bilan ularni jazoni ijro etish sohasida tashvishga solayotgan muammolarni hal etishda samarali muloqot o‘rnatish, jazoni ijro etish muassasasidan ozod etilgan shaxslarni ijtimoiy moslashuvini amalga oshirishda fuqarolik jamiyati institutlari bilan uzviy hamkorlikni ta'minlash;

jazoni ijro etish muassasalarida, shu jumladan manzil koloniyalarda jazoni o‘tash tartibini takomillashtirish, voyaga yetmagan mahkumlarga nisbatan jazoni ijro etish tizimini tubdan yaxshilash;

jazoni ijro etish muassasalari va ularning tashkilotlarining ishlab chiqarish, qishloq xo‘jaligi va xizmatlar ko‘rsatish faoliyatini rivojlantirish orqali mahkumlarning ish bilan bandlik darajasini yanada oshirish;

davlat va xo‘jalik boshqaruvi organlari va boshqa tashkilotlarning moddiy-texnika ta'minotiga bo‘lgan ehtiyojini jazoni ijro etish muassasalari va ularning tashkilotlarida ishlab chiqariladigan mahsulotlar hisobiga qondirishga qaratilgan chora-tadbirlarni amalga oshirish;

jazoni ijro etish muassasalari faoliyatini tashkil etishning zamonaviy shakl va usullarini hamda ilg‘or axborot-kommunikatsiya texnologiyalarini keng joriy etish.

O‘zbekiston Respublikasi Ichki ishlar vazirligi Huquqbuzarliklar profilaktikasi bosh boshqarmasi Ozodlikdan mahrum etish bilan bog‘liq bo‘lmagan jazolarni ijro etilishini nazorat qilish boshqarmasi negizida Jazoni ijro etish bosh boshqarmasi huzurida Probatsiya xizmati tashkil etiladi.

Belgilab qo‘yilishicha:

Qoraqalpog‘iston Respublikasi Ichki ishlar vazirligi, Toshkent shahar ichki ishlar bosh boshqarmasi va viloyatlar ichki ishlar boshqarmalari rahbarining jazoni ijro etish va probatsiya bo‘yicha o‘rinbosari lavozimi joriy etiladi;

probatsiya xizmatining tuman (shahar) bo‘limlari hududiy ichki ishlar organlari rahbarining jazoni ijro etish va probatsiya bo‘yicha o‘rinbosarining bevosita bo‘ysunuviga o‘tkaziladi;

probatsiya xizmatining tuman (shahar) bo‘limlari huzurida ushbu xizmat faoliyatiga ko‘maklashish uchun nafaqadagi ichki ishlar organlari xodimlari va faol fuqarolar ishtirokida jamoatchilik guruhlari faoliyati yo‘lga qo‘yiladi.

Probatsiya xizmatining asosiy vazifalari etib quyidagilar belgilanadi:

ozodlikdan mahrum qilish bilan bog‘liq bo‘lmagan jazolar (axloq tuzatish ishlari, majburiy jamoat ishlari, muayyan huquqdan mahrum qilish, ozodlikni cheklash)ni ijro etish;

shartli hukm qilingan va jazoni o‘tashdan muddatidan ilgari shartli ozod qilingan shaxslarning xulq-atvori ustidan nazorat qilish;

probatsiya xizmati hisobidagi shaxslarning shaxsini o‘rganish, ijtimoiy-psixologik portretini tuzish, xulq-atvorini tuzatish, qonunga itoatkor turmush tarzini shakllantirish, boshqa shaxslarga salbiy ta'sirini bartaraf etish kabi profilaktik ta'sir choralarini ko‘rish orqali ular tomonidan huquqbuzarliklar sodir etilishining oldini olish;

probatsiya xizmati hisobidagi shaxsning huquqlari, erkinliklari va qonuniy manfaatlarini ta'minlash, ijtimoiy va reabilitatsion dasturlarni amalga oshirilishini muvofiqlashtirish.