O‘zbekistonda mahkumlarning yangi kiyimlari namunasi joriy etiladi

O‘zbekistonda iqlim sharoitlari va zamonaviy talablarga javob beradigan mahkumlarning kiyimlari joriy etiladi. Bu 2018 – 2021 yillarda O‘zbekiston Respublikasining jinoyat-ijroiya tizimini yanada takomillashtirish bo‘yicha yo‘l xaritasida nazarda tutilgan.

Qayd etilishicha, ilg‘or xorijiy tajribaga asoslanib, iqlim sharoitlari va zamonaviy talablarga javob beradigan mahkumlarning kiyimlari namunasi ishlab chiqiladi.

Mahkumlarning yangi kiyimlari namunasini Toshkent viloyati Chirchiq shahridagi jazoni ijro etish muassasasida sinovdan o‘tkazish, mahkumlarning fikrlarini o‘rganish asosida kiyim namunasini takomillashtirish rejalashtirilmoqda.

Mahkumlarning yangi kiyimlari namunasini bosqichma-bosqich joriy etish mo‘ljallangan.

Bu boradagi ishlar uchun IIV mas'ul etib belgilanadi.

Eslatib o‘tamiz, avvalroq mahkumlarning qarindoshlari yoki boshqa shaxslar bilan masofali video-uchrashuvi tashkil etilishi xabar berilgandi.