Rossiya prezidenti matbuot kotibi Dmitriy Peskovning fikricha, Rossiya-Amerika munosabatlari Qo‘shma Shtatlardagi saylovlar arafasida ichki siyosiy manfaatlar qurboni bo‘ladi. U bu haqda «Perviy kanal»dagi «Bolshaya igra» teleko‘rsatuvi efirida ma'lum qildi.
Uning so‘zlariga ko‘ra, AQShda bu milliy tomoshaga aylanmoqda, sababi Rossiya-Amerika munosabatlarining ko‘rinishi ko‘p jihatdan AQSh ichki siyosiy muhitining o‘ziga xos mahsulotidir.
«Hozir, katta ehtimol bilan, vaziyat yanada keskinlashadi. Buni osonlikcha taxmin qilish mumkin», - dedi Peskov.
Matbuot kotibining qo‘shimcha qilishicha, Rossiya va AQSh prezidentlari Vladimir Putin hamda Donald Tramp hozirgi paytda alohida munosabatlarga ega emas, chunki bunga imkoniyat ham bo‘lmadi.
Eslatib o‘tamiz, avvalroq Kreml: Vashingtonning o‘zi tashabbus ko‘rsatmayotgani haqida bayonot bergandi.