Toshkentda «Olimlar shaharchasi» quriladi

Normativ-huquqiy hujjatlar loyihalari muhokamasi portalida Vazirlar Mahkamasining «Toshkent shahar Mirzo Ulug‘bek tumanidagi «Ulug‘bek» shaharchasi negizida barpo etiladigan «Olimlar shaharchasi»ni qurish direksiyasini tashkil etish to‘g‘risida»gi qarori loyihasi joylashtirildi.

Hujjat bilan O‘zbekiston Respublikasi Fanlar akademiyasi, Innovatsion rivojlanish vazirligi, Toshkent shahar hokimligi va «O‘zsanoatqurilishbank» ATBlarning Toshkent shahar Mirzo Ulug‘bek tumanidagi «Ulug‘bek» shaharchasi negizida barpo etiladigan «Olimlar shaharchasi»ni qurish bo‘yicha Toshkent shahar hokimligi qoshida «Obektlarni qurish va ulardan foydalanish direksiya» DUK tashkil etish to‘g‘risidagi takliflari kabul qilinishi mumkin.

Quyidagilar Direktsiyaning asosiy vazifalari etib belgilanadi:

«Olimlar shaharchasi» hududida olib boriladigan barcha qurilish obektlarida buyurtmachi vazifasini bajarish;

qurilishga potensial investorlarni, shu jumladan xorijiy investorlarni jalb etish maqsadida mahalliy va xorijiy ommaviy axborot vositalarida, shuningdek, idoraviy mansub «Olimlar shaharchasi»ni qurish va uning faoliyati bo‘yicha global Internet tarmog‘i orqali taqdimot tadbirlarini tashkil etish va keng tashviqot-reklama ishlarini olib borish;

«Olimlar shaharchasi» hududida realizatsiya qilinadigan loyihalarni amalga oshirilishi ustidan doimiy monitoring yuritish;

«Olimlar shaharchasi» hududida obektlar qurilishini loyihalashtirishda loyiha tashkilotlari tomonidan energiyani tejaydigan zamonaviy texnologiyalar joriy etilishi hamda yuqori texnologik materiallar va buyumlardan samarali foydalanilishining ta'minlanishini nazorat qilish;

investorlar va qurilish pudrat tashkilotlari tomonidan qabul qilingan majburiyatlarni lozim darajada bajarilishini nazorat qilish, kabul qilingan majburiyatlar investorlar va qurilish pudrat tashkilotlari tomonidan bajarilmagan yoki lozim darajada bajarilmagan taqdirda «Olimlar shaharchasi» hududida investitsiya kiritish va qurilish to‘g‘risidagi bitimlarni muddatidan oldin bekor qilish to‘g‘risida qarorlar qabul qilish;

investorlar, ishlarni bajaruvchilar va xizmat ko‘rsatuvchilar, binolar, inshootlar va turar joylarning mulkdorlari va ulardan foydalanuvchilar tomonidan qurilish-montaj ishlarini bajarishda va obektlardan foydalanishda belgilangan yong‘in va texnika xavfsizligi qoidalariga, shaharsozlik normalari va qoidalariga rioya etilishi ustidan texnik nazoratni amalga oshirish.

Toshkent shahar hokimligi (J.Artikxodjayev), Qurilish vazirligi (A.To‘xtayev) va O‘zbekiston Respublikasi Fanlar akademiyasi (B.Yuldashev):

Direktsiya faoliyatining samarali tashkil etilishini nazorat qilish va muvofiqlashtirish bo‘yicha kompleks chora-tadbirlarni amalga oshiradi;

qurilish ishlari amalga oshirilishida va vakolatli tashkilotlar tomonidan muhandislik kommunikatsiyalarini tashqi tarmoqlarga ulashda «Olimlar shaharchasi» hududlarini tayyorlash uchun mas'ul bo‘lgan davlat va xo‘jalik boshqaruvi organlari hamda mahalliy ijro etuvchi hokimiyat organlarining o‘zaro hamkorligini ta'minlaydi.