Normativ-huquqiy hujjatlar loyihalari muhokamasi portalida Vazirlar Mahkamasining “Davlat uy-joy fondiga qarashli turar-joylardan foydalanishni tartibga solishga qaratilgan normativ-huquqiy hujjatlarni tasdiqlash to‘g‘risida”gi qarori loyihasi joylashtirildi.
Hujjat bilan quyidagilar:
Davlat uy-joy fondi to‘g‘risidagi Nizom;
Turar joyga ko‘chib kirish uchun asos bo‘ladigan yagona namunadagi hujjat (order) namunasi;
Davlat uy-joy fondidagi turar joylarni ijaraga berish tartibi to‘g‘risidagi Nizom;
Davlat uy-joy fondidagi turar joyning ijara shartnomasi namunasi;
Xizmat turar joylari olish huquqiga ega bo‘lgan shaxslar ro‘yxati;
Turar joyni ijaraga oluvchiga topshirish dalolatnomasi namunasi tasdiqlanishi mumkin.
O‘zbekiston Respublikasi davlat uy-joy fondi to‘g‘risidagi nizomga ko‘ra, turar joylar uy-joy sharoitlarini yaxshilashga muhtoj bo‘lgan fuqarolarga taqdim etiladi.
Uy-joy sharoitlarini yaxshilashga muhtoj bo‘lgan fuqarolarni hisobga olish, turar joy maydonini olish uchun navbatni belgilash, shuningdek uni taqsimlash va davlat uy-joy fondi uylarida ijara shartnomasi shartlari asosida fuqarolarga taqdim etish joylardagi mahalliy davlat hokimiyat organlari va to‘la xo‘jalik yuritishida yoki operativ boshqaruvida idoraviy uy-joy fondi bo‘lgan davlat korxonalari, muassasalari va tashkilotlari tomonidan amalga oshiriladi.
Ushbu maqsadlarda joylardagi mahalliy davlat hokimiyat organlari qaroriga va idoralar buyrug‘iga asosan ular qoshida turar joy masalalari bo‘yicha komissiyalar tuziladi. Komissiya tarkibida fuqarolarning o‘zini o‘zi boshqarish organlarining vakili bo‘lishi shart.
Xususiy mulk sifatida uy-joylarga ega bo‘lgan va uy-joy sharoitlarini yaxshilashga muhtoj bo‘lgan shaxslar, shuningdek ushbu uylarda yashovchi boshqa shaxslar umumiy asoslarda uy-joy bilan ta'minlanadi.
Mehnatga qobiliyatsizlar, yolg‘iz qariyalar, pensionerlar va ularning oila a'zolariga, agar ularning jon boshiga to‘g‘ri keladigan o‘rtacha oylik daromadlari eng kam ish haqidan oz bo‘lsa, shuningdek birinchi marta nikohdan o‘tgan turar joyga muhtoj yosh oilalarga, O‘zbekiston Respublikasi Vazirlar Mahkamasi tomonidan belgilangan ro‘yxatga binoan fuqarolarning ijtimoiy himoyalanmagan va ta'minoti oz boshqa toifalariga mahalliy davlat hokimiyat organlari huzurida aniq maqsadga qaratilgan ijara shartnomasi talablari asosida xususiylashtirish huquqisiz foydalaniladigan kommunal uy-joy fondi tashkil etiladi.
Mavzuga oid
Uy-joyga muhtoj bo‘lgan yetim bolalar va ota-ona qaramog‘idan mahrum bo‘lgan bolalar kommunal uy-joy fondi uylaridagi turar joylar bilan qonun hujjatlarida belgilangan tartibda ta'minlanadi.
Munitsipal, idoraviy uy-joy fondi va aniq maqsadli kommunal uy-joy fondidan turar joylar fuqarolarga uy-joy maydonining ijtimoiy normasiga muvofiq beriladi.
Uy-joy maydonining ijtimoiy normasi Qoraqalpog‘iston Respublikasi Vazirlar Kengashi, viloyatlar va Toshkent shahar hokimliklari tomonidan bir kishi hisobiga o‘n olti kvadrat metrdan kam bo‘lmagan umumiy maydon hajmida, kreslo-aravachada harakatlanadigan nogironlar uchun esa – yigirma uch kvadrat metrdan kam bo‘lmagan hajmda belgilanadi.
Er-xotindan tashqari turli jinsga mansub shaxslar bir xonaga yeki bir xonali kvartiraga joylashtirilishiga yul qo‘ymaslik maqsadida munitsipal, idoraviy uy-joy fondi va aniq maqsadli kommunal uy-joy fondidan uy-joy maydonining ijtimoiy normasidan ortiqcha turar joy berilishi mumkin.
Davlat idoralarida ishlayotgan va uy-joy sharoitini yaxshilashga muhtoj bo‘lgan fuqarolarni hisobga olish ularning ish joyida yoki istagiga ko‘ra yashash joyida ham amalga oshiriladi.
Fuqarolarni hisobga qo‘yish uchun uy-joy sharoitlarini yaxshilashga muhtoj bo‘lgan fuqaro yoki uning vakili tomonidan ariza topshiriladi va unga quyidagilar ilova qilinadi: uy daftari nusxasi yoki 17 shakldagi kvartira kartochkasi nusxasi, ish joyidan ma'lumotnoma, kadastr hujjati nusxasi, ayrim surunkali kasalliklarning og‘ir turlari bilan kasallangan fuqarolarga sog‘liqni saqlash muassasalaridan ma'lumotnoma.
Berilgan ariza uy-joy sharoitlarini yaxshilashga muhtojlar hisobiga qo‘yish to‘g‘risidagi fuqarolarning arizalarini ro‘yxatga olish kitobida ro‘yxatga olinadi.
Uy-joy sharoitlarini yaxshilashga muhtoj bo‘lganlar hisobida turgan fuqarolarga uy-joylarni hisobga qo‘yish vaqti va ushbu aholi punktida foydalanishga topshirilayotgan va bo‘shayotgan uy-joylarning maydonidan kelib chiqqan holda, ro‘yxatda belgilangan navbat tartibida taqdim etiladi.
Uy-joyni taqdim etish navbatini belgilashda fuqarolarning hisobga qo‘yilish vaqti asosiy mezon hisoblansa, fuqarolarning teng sharoitlarida esa – ularning uy-joy bilan ta'minlanganlik darajasi va ushbu idorada ish staji hisoblanadi.
Fuqarolarga uy-joyni taqdim etish navbati quyidagilar uchun qo‘llaniladi:
a) joylardagi mahalliy davlat hokimiyati organlari tomonidan yashash joyi bo‘yicha hisobga qo‘yilgan fuqarolar;
b) qonunchilikda ko‘zda tutilgan holatlarni istisno qilgan holda, o‘zaro ma'muriyat va kasaba uyushmasi tomonidan kelishilgan holda ish joyi bo‘yicha hisobga kiritilgan fuqarolar.
Navbatdan tashqari uy-joy quyidagilar uchun beriladi:
a) uy-joyi tabiiy ofat oqibatida yashash uchun yaroqsiz holga kelgan fuqarolar;
b) davlat bolalar muassasalaridan, qarindoshlaridan, vasiylardan qaytgan fuqarolar, agar qonun bo‘yicha ilgari egallab turgan uy-joy uchun huquqi saqlanib qolingan bo‘lsa, biroq ushbu uy-joyga ko‘chib kirish imkoni bo‘lmasa. Ushbu holatlarda bolalar joylardagi mahalliy davlat hokimiyati organlari tomonidan uy-joylar bilan ta'minlanadilar;
v) noqonuniy javobgarlikka tortilgan va keyinchalik reabilitatsiya etilgan fuqarolar, agar ular avval egallab turgan uy-joyni qaytarib olishning imkoni bo‘lmasa.
Reabilitatsiya qilingan fuqarolar hukm ijro etilgunga qadar yashagan joy hududidagi mahalliy davlat hokimiyat organlari tomonidan uy-joy bilan ta'minlanadi;
g) boshqa aholi punktlaridan o‘tkazilgan yoki taklif qilingan rahbarlar va mutaxassislar, shuningdek saylanadigan lavozimga saylangan shaxslar, agar bu boshqa joyga ko‘chib o‘tish bilan bog‘liq bo‘lsa;
d) O‘zbekiston Respublikasi qonunchiligida ko‘zda tutilgan boshqa hollarda.
Davlat uy-joy fondidan uy-joy bilan ta'minlash uchun fuqarolarni hisobga olishda zarur bo‘lgan shart-sharoitlar ro‘yxati:
1. Turar joy maydoniga ega bo‘lmagan, xususiy kvartirada yoki yashash uchun yaroqsiz uy-joylar (baraklar, vaqtinchalik uylar, avariya holatidagi uylar, yerto‘lalarda yashovchi fuqarolar).
2. Har bir oila a'zosi 16 kvadrat metrdan, kreslo-aravachada harakatlanadigan nogironlar uchun 23 kvadrat metrdan kam bo‘lgan turar joy bilan ta'minlanganlar.
3. Yotoqxonalarda, ishlab chiqarish va yordamchi xonalarda yashovchilar, shuningdek, o‘qishlari sababli yotoqxonalarga ko‘chib o‘tgan fuqarolar bundan mustasno.
4. Alohida shaxsiy hisobga ega bo‘lgan, qarindoshlik aloqalari bo‘lmagan ikki va undan ko‘p oila bo‘lib bir kvartirada yashovchilar.
5. Alohida kvartirada yashashga muhtoj bo‘lgan, respublika Sog‘liqni saqlash vazirligi tomonidan tasdiqlangan ayrim surunkali kasalliklarning og‘ir shakllariga chalinganlar.
6. Uy-joy sharoitlarini yaxshilashga muhtoj bo‘lganlar hisobiga Toshkent shahrida oxirgi 5 yildan kam bo‘lmagan muddat davomida yashayotgan va ro‘yxatda turgan, boshqa aholi punktlarida kamida 3 yil yashayotgan va ro‘yxatda turgan fuqarolar kiritiladi.
Ushbu aholi punktida doimiy yashashidan qat'iy nazar quyidagilar uy-joy sharoitini yaxshilashga muhtoj bo‘lgan fuqarolar sifatida hisobga olinadi:
a) dala sharoitlarida kamida 20 yil ishlagan va shu tufayli doimiy yashash joyiga ega bo‘lmagan geologiya-qidiruv tashkilotlari va topografiya-geodeziya xizmatlari xodimlari;
b) ushbu banda belgilangan muddatda, ammo boshqa aholi punktlarida yashaydigan, agar ular yashash joyi bo‘yicha ish joyi joylashgan aholi punktida amalda bo‘lgan uy-joy sharoitini yaxshilashga muhtojlar hisobiga qo‘yish shartlariga javob bergan taqdirda, shu aholi punktining korxona, muassasa va tashkilotlarida uzluksiz ishlagan xodimlar.
