O‘zbekiston va Singapur integratsiyalashgan markaz tashkil etadi

O‘zbekiston Respublikasi Oliy Majlisi Senati Xalqaro munosabatlar, tashqi iqtisodiy aloqalar, xorijiy investitsiyalar va turizm masalalari qo‘mitasining raisi Alisher Kurmanov hamda “SixClouds Pte Ltd” (Singapur) kompaniyasining bosh ijro etuvchi direktori Von Xve Kiat boshchiligidagi kompaniya vakillari o‘rtasida uchrashuv bo‘lib o‘tdi. Bu haqda O‘zbekiston Respublikasi Oliy Majlisi Senatining axborot xizmati xabar qilmoqda.

Uchrashuvda tomonlar qulay investitsiya muhitini, raqobatbardosh iqtisodiy shart-sharoitlarni yaratish hamda tadbirkorlarning erkin faoliyati uchun qonunchilik asoslarini yanada mustahkamlash masalalarini muhokama qildi. 

2019–2029 yillarda “SixClouds Pte Ltd” kompaniyasi va O‘zbekiston Respublikasi o‘rtasida hamkorlikni rivojlantirish dasturi doirasida O‘zbekiston-Singapur mintaqaviy o‘quv markazi hamda tadqiqotlar va taraqqiyot bo‘yicha integratsiyalashgan markaz tashkil etish nazarda tutilayotgani qayd etildi. Bu markazlar O‘zbekistonning maktabgacha, maktab, o‘rta maxsus va oliy ta'lim tizimiga yangi dasturiy mahsulotlar va interaktiv raqamli o‘qitish platformalarini, shu jumladan ingliz va xitoy tillarini, matematika hamda maktabgacha va maktab dasturlarining boshqa asosiy fanlarini animatsion video orqali o‘qitish dasturlarini joriy etish imkonini beradi. Shundan kelib chiqqan holda, manfaatdor vazirlik va idoralarda ushbu Dastur taqdimotini o‘tkazish, shuningdek “InnoWeek-2018” Xalqaro innovatsiyalar haftaligida ishtirok etish kompaniya delegatsiyasining tashrifidan ko‘zlangan maqsad bo‘ldi. Uchrashuvda mazkur yo‘nalishda hamkorlik qilish ustuvorliklariga alohida urg‘u berildi.

Uchrashuv yakunlari bo‘yicha tomonlar ikki tomonlama aloqalarni yanada chuqurlashtirish, shuningdek xalqaro tuzilmalar doirasida hamkorlik qilish orqali birgalikdagi ishlarni davom ettirish haqida kelishib oldi.