Oq uy Putinni Vashingtonga taklif qildi

AQSh prezidentining milliy xavfsizlik masalalari bo‘yicha maslahatchisi Jon Bolton so‘zlariga ko‘ra, Oq uy Rossiya yetakchisi Vladimir Putinni Vashingtonga taklif qilgan. Bu haqda Reuters xabar bermoqda.

Bolton Tbilisiga qilgan tashrifi doirasida bunday bayonot bilan chiqdi.

«Biz prezident Putinni Vashingtonga taklif qildik», - dedi Bolton.

Shu bilan birga, Bolton hozirgi vaqtda Rossiya prezidenti taklifni qabul qilgani yoki qilmagani noma'lum bo‘lib turganiga aniqlik kiritdi.

AQSh prezidenti Donald Tramp va Putinning navbatdagi shaxsiy uchrashuvi 11 noyabr kuni, Birinchi jahon urushi yakunlanganining 100 yilligiga bag‘ishlangan tadbirlar doirasida bo‘lib o‘tishi kerak.

Eslatib o‘tamiz, avvalroq Putin Trampning yordamchisi oldida AQSh gerbi haqida hazillashgandi.