00:01 / 30.10.2018
178328
Бош вазир Оққўрғондаги ҳолатга муносабат билдирди
Фото: Ижтимоий тармоқлар

Ўзбекистон Республикаси ҳукумати раҳбари - бош вазир Абдулла Арипов Оққўрғондаги ҳолатга ўз муносабатини билдирди. Бу ҳақда у 29 октябр куни бўлиб ўтган видеоселектор пайтида маълум қилди, деб хабар бермоқда Kun.uz мухбири.

29 октябр куни Вазирлар Маҳкамаси биносида Ўзбекистон Республикаси Президенти Шавкат Мирзиёев томонидан шу куни имзоланган «Барча даражадаги давлат ҳокимияти органлари раҳбарларининг мажбурий меҳнатнинг ҳар қандай шакл ва кўринишларига йўл қўймаслик борасидаги жавобгарлигини ошириш тўғрисида» фармон мазмунини кенг жамоатчилик, хусусан барча ҳудудий раҳбарлар, ташкилот, идора ва тузилма бошлиқларига етказиш бўйича видеоселектор бўлиб ўтди. Йиғилишда Бош вазир Абдулла Арипов Зойир Мирзаевнинг ишдан олинганини эълон қилиб, бу ҳолатга муносабат билдирди.

«Мен учун бу ёмон ҳолат. Ҳукумат раҳбари сифатида, ўринбосаримнинг ушбу ишда томошабин бўлиши ё иштирокчи сифатида туриши ёмон. Президент топшириғи билан 25 октябрда бўлган воқеалар Бош прокуратура томонидан қатъий ўрганилади», дейди у.

Бош прокурор Отабек Муродов ҳам иштирок этган йиғилишда таъкидланишича, Оққўрғон туманида юз берган ҳодиса пайти Бош вазир ўринбосари Зойир Мирзаев ёнида турган Тошкент вилоят прокурори ўринбосари, вилоят ҳокими ўринбосари ҳамда бошқа мутасаддилар ҳам ишдан бўшатилган. Абдулла Ариповнинг айтишича, ушбу масала, хусусан мажбурий меҳнат масаласи билан Бош прокуратура жиддий шуғулланиши кутилмоқда.

Top