AQShda mashhur jinoyatchi turmada o‘ldirildi

Amerikalik taniqli jinoyatchi Jyeyms “Uayti” Baljyer umrbod qamoq jazosini o‘tayotgan turmada o‘ldirildi. Bu haqda Boston Globe nashri xabar berdi. 

AQSh sudi 2013 yilda Baljyerni 1970-yillar va 1980-yillar davomida sodir etilgan 11 ta qotillikda aybdor deb topgan. U o‘tgan asrda Bostondagi Winter Hill Gang jinoiy guruhiga yetakchilik qilgan.

Ta'kidlanishicha, Baljyer yaqinda boshqa turmaga ko‘chirib o‘tkazilgan. 30 oktabrda 89 yoshli gangster o‘ldirilgan holda topilgan. Uni o‘ldirishda boshqa mahbus gumon qilinmoqda. 

Ta'kidlanishicha, aynan Baljyer rejissyor Martin Skorsezening “Adashganlar” filmidagi bosh qahramonlardan biri – irland mafiyasi xo‘jayini Frenk Kostelloga prototip bo‘lgan. Ushbu film 2007 yilda yilning eng yaxshi filmi sifatida "Oskar" mukofotiga sazovor bo‘lgan.

Baljyer 1994 yilda qochoqlikda yurganda, AQSh hukumati uni butun dunyo bo‘ylab qidirgan. Uni tutishdagi yordam uchun 2 mln dollarlik mukofot tayinlanib, 10 nafar tutilmagan bosh jinoyatchilar ro‘yxatiga kiritilgan. Baljyerni 2011 yilda Santa-Monikada aniqlashga muvaffaq bo‘lingan. U oxirgi yillar birga yashagan ayol bilan hibsga olingan.