Omadli milliarderning so‘nggi parvozi: lesterliklar qalbidan joy olgan Vichay Shrivaddanaprabxa haqida

27 oktabr kuni vertolyot halokati oqibatida halok bo‘lgan 60 yoshli Vichay Shrivaddanaprabxa Tailandning eng boy kishilari beshligidan o‘rin olgan biznesmen, mamlakatdagi King Power duty-free do‘konlar tarmog‘i egasi edi. 2016 yilda Forbes uning boyligi miqdorini 3,2 milliard dollar deb baholagan.

Vichay 2013 yilga qadar Raksriaksorn familiyasi bilan yurgan. Shrivaddanaprabxa familiyasi uning oilasiga Tailand qiroli tomonidan tuhfa etilgan. Mahalliy odatlarga ko‘ra, qirol mamlakatda yuksak muvaffaqiyatlarga erishgan fuqarolarga faxriy familiyalarni sovg‘a qiladi. “Shrivaddanaprabxa” so‘zi “uzoq davrlik muvaffaqiyatga erishgan oila” ma'nosini bildiradi.

Tailandlik milliarder 2010 yilda King Power “Lester” klubining faxriy homiysiga aylanganidan so‘ng klubni Milan Mandarichdan sotib olgandi. 

Dastlab Vichay London klubini xarid qilmoqchi bo‘lgan. Ammo uning o‘g‘li Ayavattning xotirlashicha, otasi “Lester”ning uy uchrashuvida bir marta bo‘lganidan so‘ng uni sotib olishga qaror qilgan. Bu qarorga kelish uchun unga 30 daqiqa kifoya qilgan. 

Vichay davrida “Lester” Osiyo bozorida faol ildamlay boshladi. Klub atributikalari Tailanddagi aeroportlar va Shrivadanaprabxnaga qarashli barcha do‘konlarda sotila boshladi.

Qayd qilishlaricha, futbol “Lester” prezidenti qiziqqan asosiy sport turi emasdi. Vichay Shrivaddanaprabxa ot polosining ashaddiy ishqibozi bo‘lgan. U pologa Angliyada bo‘lgan davrida qiziqib qolgan. Tailandga qaytganidan so‘ng Vichay yer sotib olib, Bangkokda polo-klub tashkil qiladi. Bu unga kamdek tuyuladi. Shundan so‘ng milliarder Tailand ot polosi assotsiatsiyasiga asos soladi. Uning kompaniyasi homiylik qiladigan King Power Foxes jamoasi 2015 yilda Angliyadagi bir nechta musobaqalarda g‘olib chiqadi.

Vichay Shrivaddanaprabxaning futbol uchrashuvlaridan so‘ng stadionni vertolyotda tark etishi dastlab angliyaliklarni hayratlantirgandi.  2015 yil dekabrda “Chelsi” “Lester” mehmoni bo‘lgan, o‘yindan so‘ng stadion suxandoni vertolyot qo‘nishi uchun maydonni tark etishni so‘rab murojaat qilganida stadiondagi barcha hayron qolgandi. Maydon o‘rtasiga qo‘ngan vertolyotda “Lester” logotipi yaraqlab turardi.

Lesterliklar uni kamtar va uyatchan bo‘lgan deyishadi. Vichay omadli ham bo‘lgan. “Lester” Angliya Premer-ligasida mo‘'jizaviy chempionligini nishonlagan kuni u kazinoda ikki yarim million funt yutib olgan. Klub o‘yinchilari sovg‘a sifatida 19ta BMW sportkarlariga ega bo‘lishgan.

27 oktabr kuni “Lester”ning uy maydoni “King Pauer” stadioni yonida Vichay Shrivaddanaprabxaning vertolyoti halokatga uchradi.

Lestershir grafligi politsiyasining ma'lum qilishicha, fojiada yana 4 kishi halok bo‘lgan. Politsiya bayonotida aytilishicha, vertolyot bortida tailandlik milliarderning ikki xodimi –  Nursara Suknamay va Kaveporn Punpare, uchuvchi Erik Svaffer va yo‘lovchi Izabela Roza Lechovich bo‘lgan.

Halokat “Lester”-“Vest Xem” uchrashuvidan keyin yuz bergan. Guvohlarning aytishicha, vertolyot odatdagidek futbol maydonidan havoga ko‘tarilgan. Bir necha soniyadan keyin uchuvchi boshqaruvni yo‘qotgan va vertolyot stadion yonidagi avtoturargohga qulagan.

“Chuqur qayg‘u va yurakda og‘riq bilan klub egasi Vichay Shrivaddanaprabxa shanba oqshomida u va yana 4 yo‘lovchi bo‘lgan vertolyot halokatga uchragan fojiada halok bo‘lganlar orasida borligini tasdiqlaymiz. Bizning barcha o‘ylar Shrivaddanaprabxa va qolgan qurbonlar oilalari bilan birga. Vichay siymosida biz yaxshi inson, hotamtoy, umrini o‘z oilasiga bag‘ishlagan, uni juda yaxshi ko‘rgan va muvaffaqiyatli boshqargan insonni yo‘qotdik. “Lester Siti” uning oilasi edi”, deb aytilgan klub bayonotida.

Yakshanba kuni «Arsenal» futbolchilari “Kristal Pelas” bilan bahsga motam bog‘ichlari bog‘lagan holda chiqishdi, “Lester”ning “Sautgempton” bilan bahsi esa boshqa kunga qoldirildi.

Shu kuni Peter Shmeyxel marhum milliarderga xayrlashuv maktubini yozdi.

«Biz sizning klubga kiritgan investitsiyalaringiz haqida barchasini bilamiz, ammo siz bundan ham ko‘proq ishni amalga oshirdingiz. Siz nafaqat klub haqida, balki butun shahar haqida qayg‘urardingiz. Lester kasalxonalari va xayriya tashkilotlariga ajratgan mablag‘laringiz haqida hech qachon unutmaymiz.

Men siz kabi bunchalik ko‘p ishlagan, sabrli, oqko‘ngil va saxiy insonni hech qachon uchratmaganman. Siz kim bo‘lishidan qat'i nazar barcha uchun vaqt ajratardingiz. Men siz bilan xuddi yetakchi, ota va asl inson sifatida faxrlanaman.

Siz futbolni butkul o‘zgartirib yubordingiz. Siz nafaqat bizning muxlislarimizni, balki butun dunyodagi ishqibozlarni imkonsiz narsaning o‘zi yo‘qligiga ishontira oldingiz. 

2011 yilda meni taklif qilganingizda, olti yil ichida biz Chempionlar ligasida o‘ynashimizni va buyuk ishlarni amalga oshirishimizni aytgandingiz. Siz menga ilhom bag‘ishladingiz. Endi kiyinish xonasida yigitlar bilan qanday hazillashayotganingizni va har qanday insonga yuqtiradigan tabassumingizni boshqa hech qachon ko‘rmasligimni o‘ylab qalbim pora-pora bo‘lmoqda”, deb yozdi darvozabon.

Dilshodbek Asqarov tayyorladi.