Andijonda «Qo‘shtepa 2» yodgorligidan topilgan noyob eksponatlar arxeologik ko‘rgazmasi namoyish etildi

Andijon tarixi va madaniyati davlat muzeyida O‘zbekiston Fanlar akademiyasi tadqiqotlar instituti va Madaniyat vazirligi tomonidan «Ko‘hna zamin durdonalari» arxeologik ko‘rgazmasi tashkil qilindi.

Unda Qo‘rg‘ontepa tumani, Qorasuv massividagi «Qo‘shtepa 2» yodgorligidan topilgan noyob eksponatlar namoyish etildi.

«Yodgorlik ko‘p qavatli bo‘lib, uning hududida antik davrdan (miloddan avvalgi IV- I asrlar) o‘rta asrlargacha bo‘lgan turli madaniyatlar shakllanishi, taraqqiyoti va inqirozi aks etgan. Bu yerda yashagan Sho‘rabashot madaniyati vakillari, asosan, yarim yerto‘la uylarda istiqomat qilishgan. Me'moriy qoldiqlar tahliliga ko‘ra, Eyloton davriga oid paxsali platforma, pol yuzasi va xo‘jalik o‘rasi aniqlandi.

Yodgorlikda olib borilgan tadqiqot ishlari davomida topilgan turli buyumlar eksponat tarzida ko‘rgazmadan o‘rin olgan», — dedi arxeologik tadqiqotlar instituti katta ilmiy xodimi, tarix fanlari nomzodi Baxtiyor Abdullayev.

Arxeologik ko‘rgazmaning ochilish marosimida qo‘shni viloyatlar, Qirg‘iziston tarixchilari, talabalar va o‘quvchi yoshlar ishtirok etishdi.

Elmurod Ermatov, Andijon
KUN.UZ muxbiri