Toshkent shahridagi Xalqaro Vestminster universiteti dekan muovini Rustam Abduraupov O‘zbekiston Respublikasi prezidenti huzuridagi Loyiha boshqaruvi milliy agentligining Abu Rayhon Beruniy nomidagi Respublika biznes va boshqaruv oliy maktabiga rahbar bo‘ldi.
Rustam Abduraupov 1985 yil iyul oyida tug‘ilgan. 2005 yilda Toshkent irrigatsiya va qishloq xo‘jaligini mexanizatsiyalash muhandislari institutini va 2007 yilda Toshkent moliya institutini tamomlaganidan so‘ng o‘zining ilmiy – tadqiqot faoliyatini Denver universiteti (AQSh) va Vageningen universitetida (Niderlandiya) davom ettirgan.
Yangi direktor rahbarligida oliy maktab jamoasi RBBOMga yuklatilgan vazifalarni bajarishni niyat qilgan. Xalqaro tajribani faol joriy etish, yetakchi fan-ta'lim muassasalari bilan hamkorlikni mustahkamlash rejalashtirilmoqda. Shu bilan birga, double degree (qo‘shaloq diplom) magistratura dasturlarini akkreditatsiya qilish bo‘yicha rejalar qisqa muddatda amalga oshiriladi.
Eslatib o‘tamiz, prezidentning joriy yil 6 sentabrdagi qaroriga muvofiq, O‘zbekiston Respublikasi prezidenti huzuridagi Loyiha boshqaruvi milliy agentligi huzuridagi Korporativ boshqaruv ilmiy-ta'lim markazining nomi O‘zbekiston Respublikasi prezidenti huzuridagi Loyiha boshqaruvi milliy agentligi qoshidagi Abu Rayhon Beruniy nomidagi Biznes va boshqaruv respublika oliy maktabi deb o‘zgartirildi.
