Toshkentdagi "International Hotel Tashkent" mehmonxonasida shaxmat bo‘yicha o‘smirlar o‘rtasidagi G‘arbiy Osiyo chempionati start oldi.
Chempionatda mintaqaning 11 mamlakatidan kelgan 300 nafar sportchi ishtirok etmoqda. Musobaqa doirasida 6, 8, 10, 12, 14, 16, 18 va 20 yoshli bo‘lgan o‘g‘il-qizlar o‘z yosh toifalarida kuch sinashyapti.
Musobaqa g‘olib va sovrindorlariga xalqaro grossmeyster, xalqaro toifadagi usta va FIDe ustasi kabi unvonlar beriladi.
Mazkur mintaqa birinchiligida O‘zbekiston sharafini turli yo‘nalishlarda jahon chempionlari Nodirbek Yoqubboyev, Humoyun Bekmurodov, Afruza Hamdamova, jahon va Osiyo chempionatlari sovrindorlari Abdimalik Abdisalimov, Bahora Abdusattorova, Ortiq Nig‘matov, Olmos Rahmatullayev va boshqa iqtidorli shaxmatchilar himoya qiladilar.
