O‘ba qishlog‘i aholisi kuz-qish mavsumida gazsiz qiynalmoqda. Buxoro tumani hokimligi mutasaddilari muammoni hal etadimi?

«Kun.uz» saytiga Buxoro viloyati, Buxoro tumani, «Kunji-qa'la» mahallasining O‘ba qishlog‘i aholisidan murojaat kelib tushdi. Unda qishloq aholisi gaz va elektr energiyasi ta'minotidagi muammolar, kuz-qish mavsumidagi qiyinchiliklar haqida bayon etib, ushbu muammolarni hal etishda yordam so‘ragan.

Mazkur murojaatni joyida o‘rganish uchun qishloqqa yo‘l oldik. Bizni qishloq odamlari kutib olishdi.

Ma'lum bo‘lishicha, qishloqda gaz tarmog‘i bor. Faqat 2013 yilda tarmoqdan uzib qo‘yilgan.

Elektr energiyasi ta'minotida muntazam uzilishlar mavjud. Qolaversa, qishloqdagi transformatorda ulanishlar me'yordan oshib ketgan. Bu esa kuz-qish mavsumida bir qator muammolarni keltirib chiqarmoqda.

Qishloq ahlining dardiga quloq tutdik.

«Qishlog‘imizda gaz 2013 yilda uzib qo‘yilgan. Qishloq aholisi suyultirilgan gaz balloni bilan ta'minlangan. Ammo uni qish kunlari uylarni istish uchun ishlatib bo‘lmaydi. Faqat oshxonada turadi. Uyni isitish uchun o‘tin va ko‘mir ishlatishga majburmiz. Ularni ham topish amrimahol. Axir, bemorlar, nogironlar va yosh bolalar bor», – deydi Latofat Nutfiyeva.

«Qishlog‘imizga gaz qayta ulanishini xohlaymiz. O‘g‘lim, kelinim va nevaralar, butun oilamiz bitta xonada turishga majburmiz. Gaz va elektr energiyasi ta'minotidagi muammolar tufayli uylarni isitish uchun hovlimizdagi mevali daraxtlarni ham kesib, yoqib tugatdik. Qo‘shni qishloqda gaz bor, ammo bizda yo‘q. Bizlarga qiyin. Misol uchun, qo‘shnim nogiron, juda ham qiynaladi sovuq kunlarda. Ko‘mir ham yo‘q», – deydi Shohida Rahmonova.

«Uyimizda uchta oila yashaymiz. Ikki nafar kelinim bor. Gaz yo‘qligi uchun qishda elektr pechlardan foydalanamiz. Ammo elektr energiyasi ham tez-tez o‘chayotgani tufayli buning ham ilojini qilolmayapmiz. Bugunning o‘zida ham bir necha marta tok o‘chdi», – deydi Farog‘at Amonova.

Aholining e'tirozlarini tinglagach, ushbu mahalla raisi Furqat Niyozov bilan suhbatlashdik.

«Qishloq aholisining e'tirozlari to‘g‘ri. Haqiqatan ham 2013 yilda gaz tarmoqdan uzilgan. Bunga tegishli idora mutasaddilari chekka qishloqqa tabiiy gaz yetkazib berolmasligini vaj qilib ko‘rsatgan. Ammo suyultirilgan gaz balloni to‘liq yetkazib berilmoqda. Gaz tarmoqdan uzilishida odamlarning ham aybi bor. O‘sha vaqtlar gaz tarmog‘iga noqonuniy ulanishlar, har xil gaz so‘ruvchi jihozlar o‘rnatish avj oldi. Bunday holatlar fojia bilan tugagan vaqtlar ham bo‘ldi. Shu sabablar va gaz bosimi past bo‘lgani uchun qishloq gaz tarmog‘idan uzildi. Ko‘mir masalasiga kelsak, fuqarolarga ehtiyojiga qarab, cheklanmagan miqdorda tarqatiladi», – deydi Kunji-qa'la mahallasi raisi Furqat Niyozov.

Qishloq aholisi ko‘mirning sifati talab darajasida emasligini bildirdi. Mahalla raisi haqiqatan ham ko‘mirning sifati pastligini tasdiqladi.

Ko‘mir xarid qilgan xonadondagi fuqaro bilan shu haqida suhbatlashdik.

«Ko‘mirni sifati past bo‘lsa ham sotib olishga majburmiz. Gaz yo‘q, tok muntazam o‘chadi. Ko‘mirning 50 foizigina yoqishga yaraydi. Qolganini ishlatib bo‘lmaydi», – deydi Mehrinoz Yoshiyeva.

Qishloqdagi muammolarni o‘rganib, ushbu holatlarga tuman mutasaddilaridan izoh olish uchun Buxoro tumani hokimligiga yo‘l oldik. Ammo tuman hokimligidan biror mutasaddini topa olmadik. Qorovul bu holatni yakshanba kuni, deb izohlagan bo‘lsa, o‘zini Majid deb tanishtirgan hokimiyat navbatchisi hamma paxtadaligini bildirdi. Shu kuni tuman mutasaddilari telefon raqamlariga bog‘lanish uchun qilgan urinishlarimiz zoye ketdi.

Keyinchalik tuman hokimining ushbu masalalarga mas'ul bo‘lgan o‘rinbosari Zokir Tohirov bilan bog‘landik.

«Qishloqning gaz tarmog‘i tegishli chora-tadbirlar asosida uzib qo‘yilgan. Elektr energiyasiga esa viloyatdan cheklovlar berilgan. Shuning uchun elektr energiyasida uzilishlar bo‘lyapti. Bu viloyatdan kelgan topshiriq. Qishloqqa suyultirilgan gaz ballonlari yetkazib berilyapti. Ko‘mir sifatiga kelsak, bu uchun biz javob bermaymiz. Kelganini tarqatamiz», – deydi Z.Tohirov.

Elektr energiyasi ta'minotidagi muammolar yuzasidan tuman «Elektr energiyasi» korxonasi rahbari Komil Qoryog‘diyevdan izoh so‘radik.

«Kuz-qish mavsumida elektr energiyasi iste'moli to‘rt baravar oshib ketdi. Shu tufayli elektr energiya tanqisligi yuzaga kelgan. Shuning uchun bu borada cheklovlar bo‘lyapti. Qishloqdagi transformatorga kelsak, haqiqatan ham to‘g‘ri, ulanishlar belgilangan me'yordan oshib ketgan. Qishloqqa yana bir transformator o‘rnatishni rejalashtiryapmiz. O‘n besh kunda bu muammoni hal qilamiz», – deydi K.Qoryog‘diyev.

Qishloqning gaz tarmog‘idan uzib qo‘yilishi yuzasidan «O‘ztransgaz» Buxoro viloyati hududiy gaz ta'minoti filiali boshlig‘i O‘ktam Abdiyev izoh berdi.

«Bu qishloq o‘rganishlar natijasida gaz yetib bormaydigan qishloqlar qatoriga kiritilgan. Vazirlar Mahkamasi, viloyat va tuman hokimlarining tegishli qarorlari asosida qishloq gaz tarmog‘idan 2013 yilda uzilgan. Gaz tarmog‘iga qayta ulashning imkoni yo‘q. Qishloq aholisiga imtiyozli narxda suyultirilgan gaz ballonlari muntazam yetkazilib turilibdi», – deydi u.

O‘rganishlar davomida qishloq odamlarining e'tirozlari va mutasaddilarning izohi shunday bo‘ldi.

Qishloq aholisi kuz-qish mavsumida qiynalayotgani bor gap. Yetkazib berilayotgan ko‘mir esa sifatsiz, o‘tin yo‘q. Muammo bor, uning yechimi esa mutasaddilarning zimmasida. Hammasi tegishli tartibda qilingan, qabilidagi so‘zlar bilan qishloqdagi xonadonlar isib qolmaydi. Bu borada zarur choralarni ko‘rish lozim. Albatta mutasaddilar ushbu muammolarga e'tibor qaratishiga umid bildiramiz.

Bardoshbek SAMAD o‘g‘li,
Kun.uz muxbiri