Interpolga yangi rahbar saylandi. Rossiyalik general saylovda yutqazdi

Janubiy koreyalik Kim Jong Yang Interpolning yangi rahbari etib saylandi. Bu haqda tashkilot rasmiy saytida xabar berilgan.

U Interpol rahbarligi uchun asosiy nomzod sifatida qaralgan, vitse-prezident, rossiyalik general Aleksandr Prokopchukni raqobatda ortda qoldirgan. Unga xalqaro tashkilotning bosh assambleyasida o‘tkazilgan saylovda 98 a'zo ovoz bergan.

Kim Jong Yang bungacha Interpol vitse-prezidenti bo‘lib ishlagan, keyingi oylarda esa vaqtinchalik prezident bo‘lgandi.

Interpolning avvalgi prezidenti, xitoylik Men Xunvey sentabr oyi oxirlarida g‘oyib bo‘lib qolgandi. Keyinchalik aniqlanishicha, u Xitoyda qo‘lga olingan, mamlakat hukumati uni korrupsiyada gumonlamoqda. Shundan keyin Xunvey tashkilot rahbari lavozimidan iste'foga chiqarildi.

Britaniyaning The Times nashri Aleksandr Prokopchukni asosiy nomzod sifatida e'tirof etgandi. Ammo u saylovda 64 ovoz oldi.

Prokopchuk nomzodi amerikalik senatorlar qarshiligiga uchradi. Ular Rossiya «Interpoldan doimiy ravishda ma'lumotlarni qo‘lga kiritish, siyosiy muxoliflar, dissidentlar va jurnalistlarga tayziq o‘tkazish»da foydalanib kelganini iddao qilishdi.

Litva va Ukraina esa Aleksandr Prokopchuk tashkilot rahbari etib saylansa, tashkilotni tark etishidan ogohlantirgandi.