Xalqaro savdoda texnik to‘siqlar kamayadi

«O‘zstandart» agentligi hamda Xalqaro o‘lchov va tarozilar byurosi Milliy o‘lchash etalonlari hamda milliy metrologiya institutlari tomonidan beriladigan kalibrlash va o‘lchash sertifikatlarining o‘zaro e'tirof etilishi to‘g‘risida kelishuvni imzoladi, deb yozmoqda Norma.
 
Kelishuvning amalga oshirilishidan quyidagi natijalar kutilmoqda:
 
1) mahalliy mahsulotni chet elga yetkazib berishda o‘lchash va sinov natijalarining e'tirof etilishi; 
 
2) savdoda texnik to‘siqlarni bartaraf etish, shuningdek har yili davlatlararo, xalqaro va xorijiy mamlakatlarning milliy etalonlari bilan solishtirishlar o‘tkazish imkoni;
 
Ma'lumot uchun: ILAC (Laboratoriyalarni akkreditatsiyalovchi xalqaro tashkilot) talablariga asosan, kuzatiluvchanlik ta'minlanishini isbotlash uchun KOOMeT (Davlat metrologik muassasalarning Yevrosiyo hamkorligi) doirasidagi solishtirishlarda muntazam ravishda ishtirok etish zarur.
 
3) mahalliy korxonalarning xorijiy metrologiya institutlariga tobeligini kamaytirish;
 
Ma'lumot uchun: 2012–2017 yillar davomida kalibrlashga 7 birlik etalon va 387 birlik namunaviy o‘lchash vositalari olib chiqilgan bo‘lib, deyarli $260 ming sarflangan. Asosiy solishtirishlarda ishtirok etish ushbu xarajatlarning oldini olishga imkon yaratadi.
 
4) yetakchi iqtisodiyot tarmoqlari, ijtimoiy sohalar, fan va mamlakat mudofaasining o‘lchashlar bir xilligini ta'minlashdagi ehtiyojlarining qoplanishi;
 
5) solishtirishlar o‘tkazilishida vaqtinchalik xarajatlarni qisqartirish, xom ashyo, resurslar, materiallar, mahsulotlar miqdori va sifatini ishonchli baholashni amalga oshirish maqsadida bajariladigan o‘lchashlar aniqligining oshirilishi;
 
6) normativ hujjatlarni ishlab chiqish bilan bog‘liq ilmiy-texnik hamkorlik, innovatsiya, xalqaro savdo, tijorat faoliyati sohasidagi kelishuvlarni rejalashtirish va amalga oshirish uchun texnik bazani ta'minlash;
 
7) o‘lchash natijalarining o‘lchov vositalari birliklariga kuzatiluvchanligini ta'minlash;
 
8) seminar va kurslarda ishtirok etish, shuningdek fan hamjamiyati nashrlari bilan tanishtirish vositasida metrologik faoliyatni amalga oshiradigan yuqori malakali mutaxassislarni tayyorlash.