Madaniyat sohasi blokcheyn texnologiyalari yordamida modernizatsiya qilinadi

O‘zbekiston Respublikasi Madaniyat vazirligi qoshidagi Madaniyat va san'atni rivojlantirish fondi hamda "Raqamli ishonch" fondi o‘rtasida hamkorlik qilishga doir memorandum imzolandi. Hujjatga muvofiq, ikki idora madaniyat sohasiga blokcheyn texnologiyalarini tatbiq qilish yo‘lida hamkorlik qilishga kelishib olishdi.

Madaniyat va san'atni rivojlantirish fondi o‘z faoliyati shaffofligi va monitoringi uchun yagona onlayn-platformaga muhtoj. Bugunga kelib teatrlar va boshqa davlat ko‘ngilochar muassasalari ishlovchi texnologiyalar va tizimlar eskirgan.

"Biz uchun maqsadli auditoriya - muzeylar, teatrlar, konsertlarga tashrif buyuruvchilarni bilish juda muhim. Biz shu kabi ma'lumotlarga ega bo‘lib, monitoring yuritishimiz zarur, biroq hozircha bunday imkoniyat yo‘q. Blokcheyn shunday ma'lumotlarni to‘plashga yordam berib, ularni manipulyatsiya qilish imkonini yo‘qqa chiqaradi. Chiptalarni onlayn-rejimda sotish yakuniy iste'molchiga ko‘proq ustunlik beradi va madaniyat hamda turizm sohalariga ijobiy ta'sir ko‘rsatadi. Eng muhimi, monopoliyaga yo‘l qo‘yilmaydi: tizim barcha manfaatdor kompaniyalar mazkur platformada ishlash imkoniga ega bo‘lishiga mo‘ljallab ishlab chiqiladi", - deydi Madaniyat va san'atni rivojlantirish fondi ijrochi direktori o‘rinbosari Gayane Umerova.

"Raqamli ishonch"ning vazifasi platformani ishlab chiqish va uni tatbiq qilishda maslahat berish, texnik topshiriqni tuzishga ko‘mak berishdan iborat.

"Fondning roli texnik topshiriqni to‘g‘ri tuzish, konsalting, tavsiyalar berishdan iborat. Bunda platforma yaratish uchun blokcheyn texnologiyalarni tatbiq qilish jarayoni bosqichma-bosqich kechadi. Shuningdek biz biznes-jarayonlar auditini ishlab chiqish uchun mas'ulmiz. Buning natijasida Chipta operatsiyalarini hisobga olishning yagona elektron tizimi (ChOHYaET) yaratiladi. Bu onlayn-platforma orqali odamlar teatrlar, muzeylar, hayvonot bog‘i, kinoteatrlar va boshqa davlat ko‘ngilochar muassasalariga onlayn rejimda chiptalarni xarid qilish imkonini beradi", - deya izoh beradi "Raqamli ishonch" fondining texnologiyalar bo‘yicha investitsion direktori Bobur Oqilxonov.

Tomonlar quyidagi asosiy yo‘nalishlar bo‘yicha hamkorlik qiladi:

- Chipta operatsiyalarini hisobga olishning yagona elektron tizimini ishlab chiqish;

- Ilmiy materiallarni hamkorlikda tayyorlash;

- Axborot tadbirlarini o‘tkazish;

- Ma'lumotlar va tajriba bilan tizimli almashuv;

- Ikki tomonlama malaka oshirish va maslahatlashuvlar o‘tkazish.

Turli madaniy tadbirlarga chiptalar sotishga doir elektron tizim ko‘p mamlakatlarda o‘z samaradorligi va shaffofligini isbotlagan. Blokcheyn elementlarini o‘zida jamlagan yagona elektron maydonning yaratilishi mavjud kamchiliklarni bartaraf qilib, madaniyat sohasini modernizatsiyalash imkonini beradi.