Ektor Kuper: Mening uslubim himoyaviy emas

Bugun, 6 dekabr kuni O‘zbekiston Futbol Assotsiatsiyasi binosida O‘zbekiston milliy terma jamoasi bosh murabbiyi Ektor Kuper bilan matbuot anjumani bo‘lib o‘tdi.

Jurnalistlardan biri murabbiydan o‘tgan yig‘inlardan keyin Osiyo kubogiga qanchalik tayyorligi haqida so‘radi.

«O‘rtoqlik o‘yinlariga ham, rasmiy o‘yinlarga ham bir xil yondashaman. Lekin ba'zi o‘rtoqlik o‘yinlarida ko‘zlangan maqsadga erishilmadi. Ba'zi o‘yinlarda o‘xshadi. Masalan, Shimoliy Koreya va Qatarga qarshi o‘yinlar. O‘tkazilgan 6ta o‘rtoqlik uchrashuvi ham sinov edi.

O‘yinimiz haqida gapiradigan bo‘lsak, bu natijaga erishishga qaratilgan o‘yin. Masalan, jahon chempioni bo‘lgan Fransiya ham himoyaviy o‘ynadi. Ko‘pchilikka yoqmagan o‘yin uslubi, lekin natija berdi.

Mening o‘yin uslubim ham ko‘plarga yoqmagan bo‘lishi mumkin. Lekin bu uslub jamoaga mos kelmasa, o‘zgartirish kiritaman. Men xato qilsam, o‘z vaqtida tan olishni bilaman.

Masalan, Osiyo Kubogida boshqacharoq o‘yin uslubini namoyish etishimiz mumkin. 

O‘yindan oldin qaysidir raqib qog‘ozda kuchsiz bo‘lishi mumkin. Lekin raqibni mensimaslik kerak emas. Biz barcha raqibga bir xil yondashamiz. Mening taktikam himoyaviy emas. Menga himoya qilish ham yoqadi, hujum qilish ham yoqadi. Lekin hamisha yaxshi himoyalanish zarur. 

Xavotir olmasangiz bo‘ladi, bizda hamisha B plan bo‘ladi. Raqib o‘yinidan kelib chiqqan holda vaziyat bo‘lgani zahoti hujumga o‘tishga urinamiz.

Janubiy Koreyaga qarshi o‘yinda esa o‘yinimiz yaxshi chiqmadi. Himoya va hujumda muvozanat bo‘lmadi», deya murabbiyning so‘zlarini keltirmoqda Tribuna.uz muxbiri.

Matbuot anjumanida Ektor Kuper terma jamoa Osiyo Kubogiga g‘olib bo‘lish maqsadida yo‘l olishini ma'lum qilgandi.

Ma'lumot uchun, yanvar oyida BAA maydonlari mezbonlik qiladigan Osiyo Kubogida O‘zbekiston terma jamoasi F guruhida Yaponiya, Ummon va Turkmaniston terma jamoalariga qarshi o‘yinlarda maydonga tushadi. Kuper shogirdlari turnirdagi ilk o‘yinni 9 yanvar kuni Ummonga qarshi o‘tkazadi, 13 yanvar kuni Turkmanistonga qarshi bahs bo‘lib o‘tadi. Yaponiyaga qarshi 17 yanvar kuniga belgilangan o‘yin esa guruh g‘olibi kim bo‘lishini aniqlab berishi kutilmoqda.