Boks bo‘yicha sobiq jahon chempioni va Golden Boy Promotions promouterlik kompaniyasi rahbari Oskar de la Xoyya Mutlaq jangchilar chempionati (UFC) prezidenti Dana Uaytni jangga chaqirdi. Bu haqda MMA Fighting xabar qilmoqda.
Sportchining ma'lum qilishicha, boks qoidalariga ko‘ra uch raundli jangda tashkilot rahbari bilan ringga chiqishni xohlaydi.
«Keling, ringga chiqamiz. Nima uchun yo‘q? Keling ringda ko‘rishamiz. Uch raund. Keling, buni qilamiz. Buni Saul Alvares bilan turnirda amalga oshiramiz. Men steroidlardan qutulish uchun senga besh oy vaqt ham beraman. Keyin yaxshi jismoniy holatga kelamiz va uch raund o‘tkazamiz. Men sen 20 kilogrammga og‘irroq ekanligingga ham tayyorman. Hammasi joyida, men tayyorman. Kelinglar, buni qilamiz», - deya ma'lum qildi de la Xoyya.
Uayt va amerikalik bokschi jangchilarga moliyaviy to‘lovlar bo‘yicha mojaroga kirishgan. De la Xoyyaning ishonch bildirishicha, Dana UFC sportchilariga pulni to‘liq miqdorda to‘lamaydi. Tashkilot rahbari bu ma'lumotni rad etib, bokschini giyohvand moddalarga qaramlikda aybladi.
Eslatib o‘tamiz, avvalroq Floyd Meyvezerning yaponiyalik kikbokschi bilan jangi qoidalari e'lon qilingandi.
