AQShda Tramp jamg‘armasi faoliyati tugatiladi

AQSh prezidenti Donald Tramp jamg‘armasi Nyu-York sudining jamg‘armaga qarshi da'vo arizasini ko‘rib chiqishni boshlash qaroridan keyin o‘z faoliyatini to‘xtatishga rozi bo‘ldi. Bu haqda Nyu-York bosh prokurori Barbara Andervud bayonotida aytilgan.

Iyunda Andervud jamg‘armaga qarshi Tramp prezidentlik kampaniyasi bilan noqonuniy siyosiy hamkorlik qilish va Trampning shaxsiy va ishchi manfaatlariga xizmat ko‘rsatuvchi bitimlarni amalga oshirish ayblovi bilan sudga da'vo arizasi bergan. 

Da'vo arizasiga ko‘ra, Tramp jamg‘armaning xayriya mablag‘larini o‘zining yuridik majburiyatlarini uzish, o‘zining mehmonxonalari va boshqa biznesini ilgari surish, shaxsiy buyumlar sotib olish uchun” ishlatgan. Noyabrda Nyu-York shtati oliy sudi Trampning da'vo arizasini ko‘rib chiqishni to‘xtatish talabini rad etgan. 

“Tramp jamg‘armasi faqatgina sud nazorati bilangina o‘z faoliyatini to‘xtata oladi. U qolgan xayriya mablag‘larini mening idoram tomonidan tasdiqlangan ishonchli tashkilotlar orasida taqsimlay oladi”, deb aytgan bosh prokuror.