Saloh APL to‘purari bo‘lib oldi

«Liverpul» hujumchisi Muhammad Saloh kecha «Vulverhempton» bilan o‘yinda (2:0) hisobni ochdi va APLning ushbu mavsumidagi gollari sonini 11taga yetkazib, to‘purarlar ro‘yxatida birinchi o‘ringa ko‘tarilib oldi.

26 yoshli misrlik to‘purarlar poygasida «Arsenal» hujumchisi Per-Emerik Obameyangni (10) ortda qoldirdi.

Saloh, shuningdek, kechagi 2-golda ham bevosita ishtirok etib, Virjil van Diykning goliga assistentlik qildi. Bu uning mavsumdagi beshinchi samarali uzatmasi bo‘ldi. APLning 18 o‘yinida gol+pas tizimi 16 ochko to‘plagan Saloh bu borada faqat «Chelsi» vakili Eden Azardan (16 o‘yinda 8+9) bir ochkoga ortda qolmoqda.

Statistikaga ko‘ra, «Liverpul»ning ushbu yulduzi Premer-ligada «qizillar» a'zosi sifatida o‘zi to‘qnash kelgan 22ta klubdan 20tasining darvozasini ishg‘ol eta olgan. U faqat «Manchester Yunayted» va «Suonsi Siti» klublarini dog‘da qoldira olmay kelmoqda.