«Yuventus» hujumchisi Krishtianu Ronaldu individual sovrinlarini jamoaviy yutuqlardan ustun qo‘ymasligini aytib o‘tdi.
«Shaxsiy mukofotlarga haddan ortiq berilib ketgan futbolchi emasman. Muhimi – jamoa g‘alabasiga yordam berish. Qolgan barchasi tabiiy ketma-ketlikda ro‘y beradi.
Rekordlar o‘rnatishim borasida ham xuddi shunday fikrdaman. Men o‘z o‘yinimimni yaxshilab borganim sayin rekordlar o‘z-o‘zidan yuzaga keladi, bunga katta ahamiyat qaratmayman», – dedi Ronaldu Record bilan suhbatda.
Portugaliyalik hujumchi «Yuventus»ning Chempionlar ligasida g‘olib chiqishi ehtimoli haqida ham gapirib o‘tgan.
«Butun jamoa texnik, taktik va jismoniy jihatdan o‘sishga erishdi. G‘alaba qozonish qiyinlashib bormoqda, shuning uchun ham yuqori darajamni saqlab turish uchun yana ham qattiqroq mehnat qilishim kerak.
Chempionlar ligasida g‘olib chiqishimiz juda chiroyli chiqqan bo‘lardi, bundan xursand bo‘lishim tayin. Ammo g‘olib chiqa olmasak ham, bu hayotning poyoni degani emas», – dedi Ronaldu.
Eslatib o‘tamiz, 7-raqam egasi 2018 yildagi so‘nggi o‘yinida dubl qayd etib, «Yuventus»ning «Sampdoriya»ni mag‘lub etishiga (2:1) katta hissa qo‘shdi va 19 o‘yinda urgan 14ta goli bilan A Seriya to‘purariga aylanib oldi.
