O‘zbekiston mudofaa qobiliyati mustahkamlanadi

Mamlakatning mudofaa qobiliyati mustahkamlanadi, Qurolli Kuchlarning jangovar qudrati oshiriladi. Bu haqda 2017-2021 yillarda O‘zbekiston Respublikasini rivojlantirishning beshta ustuvor yo‘nalishi bo‘yicha Harakatlar strategiyasini “Faol investitsiyalar va ijtimoiy rivojlanish yili”da amalga oshirishga oid Davlat dasturi loyihasida aytilgan.

Qayd etilishicha, tegishli kompleks chora-tadbirlar dasturi ishlab chiqiladi. Dasturda:

davlat harbiy xavfsizligini ta'minlash bo‘yicha yangi qonun hujjatlarini hisobga olgan holda Qurolli Kuchlarni qo‘llashni rejalashtirishning normativ-huquqiy asoslarini yangilash;

Qurolli Kuchlar jangovar tarkibi va tuzilishi sifat ko‘rsatkichlarini takomillashtirish;

harbiy kadrlarni o‘qitish va qayta tayyorlash, harbiy xizmatchilarning professional tayyorgarligini tashkillashtirishning innovatsion yondashuvlarini ishlab chiqish;

Qurolli Kuchlar milliy ruhini yuksaltirish, askar va ofitserlarni jismoniy va ma'naviy jihatdan barkamol etib tarbiyalash tizimini takomillashtirish;

mamlakat mudofaasini boshqarish milliy markazini yaratish va faoliyatini ta'minlash;

ilg‘or axborot-kommunikatsiya texnologiyalari asosida qo‘shinlarni boshqarish tartibini takomillashtirish;

qo‘shinlarni 2018-2021 yillarda zamonaviy qurol-aslaha va harbiy texnikalar bilan ta'minlash, ularni modernizatsiya qilish va ta'mirlash bo‘yicha kompleks dasturni sifatli ijro etish;

davlat mudofaa buyurtmasi va mudofaaga mo‘ljallangan mahsulotlarni ishlab chiqarishni tashkillashtirish sohasida yagona davlat siyosatini olib borish nazarda tutiladi.

Bajarish muddati - 2019 yil 10 aprel, ijro uchun mas'ullar - Mudofaa vazirligi, DXX,  Mudofaa sanoati davlat qo‘mitasi, FVV, Milliy gvardiya, Davlat bojxona qo‘mitasi, vazirlik va idoralar.