Olga Zabelinskaya velotrek bo‘yicha xalqaro musobaqada oltin medalni qo‘lga kiritdi

Belgiyada velotrek bo‘yicha o‘tkazilayotgan «International Belgian Track Meeting” xalqaro musobaqada O‘zbekiston vakili Olga Zabelinskaya omnium yo‘nalishida oltin medalga sazovor bo‘ldi. Mazkur yo‘nalishda kumush va bronza medallar Polsha va Belgiya sportchilariga nasib qildi.

MOQ ma'lumotlariga ko‘ra, musobaqada O‘zbekiston sharafini Zabelinskayadan tashqari, Yekaterina Knebeleva va Murod Xolmurodov himoya qilmoqda.

Zabelinskaya 2 fevralda omnium bo‘yicha o‘tgan musobaqada 192 ochko bilan oltin medalni qo‘lga kiritdi. 2-o‘rinni polshalik Lotte Kopetski (167 ochko) va 3-o‘rinni belgiyalik Marta Yaskulska (159 ochko) egalladi.

Musobaqalarda 15 davlatdan sportchilar ishtirok etmoqda.

Ta'kidlash joizki, musobaqada 2020 yilgi Tokio Olimpiadasida ishtirok etish uchun reyting ochkolari uchun kurash olib boriladi.