Yevropaning 6 davlati Guaydoni tan oldi

Shvetsiya TIV rahbari Margot Vallstrem ma'lum qilishicha, mamlakat Venesuela muxolifati yetakchisi Xuan Guaydoni Venesuelaning qonuniy vaqtinchalik rahbari sifatida tan oladi. U bu haqda Sveriges Radio radiosida aytib o‘tdi.

Uning so‘zlariga ko‘ra, Shvetsiya hukumati Guaydoni qo‘llab-quvvatlaydi va uni qonuniy vaqtinchalik prezident, deb hisoblaydi.

Ispan bosh vaziri Pedro Sanches Xuan Guaydo Venesuelaning vaqtinchalik prezidenti sifatida tan olinishini e'lon qildi. Bu haqda Reuters xabar bermoqda.

Uning so‘zlariga ko‘ra, Venesuela imkon qadar tezroq yangi saylovlarni o‘tkazishi kerak.

«Men prezident Xuan Guaydoni Venesuela uchun javobgar prezident sifatida tan olaman», - deya ma'lum qilgan Sanches.

Buyuk Britaniya, Avstriya, Daniya va Fransiya ham Venesuela muxolifati yetakchisi Xuan Guaydoni mamlakatning muvaqqat prezidenti sifatida tan oldi. Bu haqda RIA «Novosti» xabar tarqatdi.

Qayd etilishicha, Avstriya kansleri Sebastyan Kurs va Britaniya TIV rahbari Jyeremi Xant bu haqda tvitterdagi sahifalarida yozishgan.

Xantning so‘zlariga ko‘ra, prezident Nikolas Maduro belgilangan 8 kunlik muddat ichida prezidentlik saylovini o‘tkazmagan.

«Buyuk Britaniya yevropalik hamkorlar bilan birga Xuan Guaydoni ishonchli saylovlarga qadar vaqtinchalik konstitutsiyaviy prezident, deb tan oladi», - deya yozgan Xant.

Eslatib o‘tamiz, avvalroq Venesuela TIV Trampning bayonotiga javob qaytargani, Maduro Guaydoga chaqiriq bilan chiqqani xabar qilingandi.