O‘zbekistonda qurilish sohasida yangi nazorat inspeksiyasi tashkil etiladi

Normativ-huquqiy hujjatlar loyihalari muhokamasi portalida “O‘zbekiston Respublikasi Qurilish vazirligi huzuridagi Davlat qurilish nazorat inspeksiyalar faoliyatining samaradorligini oshirish chora-tadbirlar to‘g‘risida”gi hujjat loyihasi joylashtirildi.

Hujjat bilan O‘zbekiston Respublikasi Qurilish vazirligi huzuridagi Qurilish sohasida nazorat inspeksiyasi negizida o‘z balansi, bank muassasalarida hisobraqamlari hamda O‘zbekiston Respublikasining Davlat gerbi tasvirlangan muhriga va yuridik shaxs maqomiga ega bo‘lgan O‘zbekiston Respublikasi Qurilish vazirligi huzuridagi Davlat qurilish nazorat inspeksiyasi etib qayta tashkil etilishi mumkin.

Inspeksiyaga O‘zbekiston Respublikasi qurilish vazirining tavsiyasiga ko‘ra O‘zbekiston Respublikasi Prezidenti tomonidan lavozimga tayinlanadigan va lavozimidan ozod qilinadigan Inspeksiya boshlig‘i rahbarlik qiladi.

Inspeksiya boshlig‘i tomonidan lavozimga tayinlanadigan va lavozimidan ozod qilinadigan birinchi o‘rinbosar hamda o‘rinbosarga ega bo‘ladi.

Inspeksiya boshlig‘i o‘z maqomiga ko‘ra O‘zbekiston Respublikasi qurilish vazirining birinchi o‘rinbosariga tenglashtiriladi.

Inspeksiya faoliyatini moliyalashtirish O‘zbekiston Respublikasi Davlat budjeti mablag‘lari va budjetdan tashqari manbalar hisobiga amalga oshiriladi.

Inspeksiya qurilish faoliyatida davlat nazoratini amalga oshiruvchi vakolatli davlat organi hisoblanadi.

Inspeksiya shahar va qishloq aholi yashash punktlarini qurilishida shaharsozlikka oid qonun hujjatlari, shaharsozlik normalari, qoidalari va standartlariga rioya etilishi ustidan Davlat nazoratini amalga oshiradi.

Inspeksiya shaharsozlik faoliyati sohasida qurilish sifatini nazorat qiluvchi buyurtmachining texnik nazorati, loyiha tashkilotining mualliflik nazorati, pudratchining qurilish-montaj ishlari va ishlab chiqarish xizmatlarini tanlab nazoratdan o‘tkazadi (300 kubdan kam bo‘lgan va yakka tartibdagi uy-joy qurilishi bundan mustasno).

O‘zbekiston Respublikasi Qurilish vazirligining Inspeksiya va uning hududiy inspeksiyalari moddiy-texnik bazasini mustahkamlash hamda ularning xodimlarini ijtimoiy himoya qilish va moddiy rag‘batlantirishni kuchaytirish bo‘yicha moliyaviy mablag‘larni jamlovchi va taqsimlovchi O‘zbekiston Respublikasi Qurilish vazirligi huzuridagi Davlat qurilish nazorat inspeksiyasi faoliyatini qo‘llab-quvvatlash jamg‘armasi tashkil etish to‘g‘risidagi taklifi ma'qullanishi mumkin.

Quyidagilar Jamg‘arma mablag‘larini shakllantirish manbalari etib belgilanadi:

hududiy davlat qurilish nazorat inspeksiyalarining shaharsozlik sohasida amalga oshirgan faoliyati va ko‘rsatadigan xizmatlaridan olingan sof daromadlarning 10 foizi miqdorida yo‘naltiradigan ajratmalari;

Jamg‘armaning bo‘sh mablag‘larini banklardagi depozitlarda joylashtirishdan olingan daromadlar;

qonun hujjatlarida taqiqlanmagan boshqa tushumlar.

Shunday tartib o‘rnatiladiki, unga ko‘ra 2019 yil 1 martdan boshlab:

barcha qurilish obektlarning loyihalari ekspertiza organlariga taqdim etishdan oldin Davlat yong‘in xavfsizligi xizmati, Davlat sanitariya epidemiologiya nazorat markazi, Bandlik va mehnat munosabatlari vazirligi va tegishincha Sanoat xavfsizligi davlat qo‘mitasi hamda, “O‘zdavneftgazinspeksiya” Davlat inspeksiyasi bilan kelishilishi majburiydir;

buyurtmachining texnik nazoratchilari bilan birgalikda loyiha tashkilotlari tasdiqlangan loyihalar bo‘yicha loyiha yechimlardan chetga chiqmasdan to‘la to‘kis tatbiq qilinishiga shaxsan javobgar hisoblanadi;

qurilish obektlar loyihalarini ishlab chiqqan tashkilot (bosh loyihachi) mualliflik nazoratini qurilish obekti foydalanishga qabul qilingunga qadar olib borishga majburdir;

qurilishi tugallangan barcha obektlarni foydalanishga qabul qilish hay'at tarkibida Davlat yong‘in xavfsizligi xizmati vakillari qatnashadi;

loyiha muallifi texnik nazorat xodimi bilan birgalikda qurilish obekti foydalanishga qabul qilinish davrida sanitariya normalari, seysmik talablar, mehnat xavfsizligi bo‘yicha qo‘shma ijobiy xulosalarini qabul hay'atiga taqdim qiladi.

Belgilanishicha:

Davlat hokimiyati va boshqaruvi organlari, huquqni muhofaza qiluvchi va nazorat qiluvchi tuzilmalar tomonidan Inspeksiya va uning hududiy inspeksiyalari xodimlari zimmasiga ularning vakolatiga kirmaydigan vazifalarning yuklanishi taqiqlanadi;

Inspeksiya zimmasiga yuklatilgan vazifalarni bajarish uchun zarur bo‘lgan axborot, hujjatlar va boshqa materiallar uning qonuniy talabiga ko‘ra bepul taqdim etiladi;

Davlat organlari, shu jumladan huquqni muhofaza qiluvchi va nazorat qiluvchi tuzilmalar mazkur qarorga muvofiq Inspeksiya va uning hududiy inspeksiyalari zimmasiga yuklatilgan vazifa va funksiyalarni bajarishda har tomonlama ko‘maklashishi shart.

Qoraqalpog‘iston Respublikasi Vazirlar Kengashi, viloyatlar va Toshkent shahar hokimliklari bir oy muddatda hududiy inspeksiyalar balansiga nol qiymatida xizmat binolarni ajratib beradi.