Bashar Asad 8 yil ichida ilk bor Eronga tashrif buyurdi

Suriya prezidenti Bashar Asad 25 fevralda Eronga tashrif bilan keldi. Bu Asadning Suriyada 2011 yilda boshlangan urushdan keyin qo‘shni davlatga ilk tashrifi bo‘ldi. Asad oxirgi 8 yil ichida rasmiy tashrif bilan faqatgina Rossiyaga tashrif buyurgan.  

Asad tashrifi davomida Eron prezidenti Hasan Ruhoniy bilan uchrashdi. Ikki yetakchi ikki tomonlama munosabatlarni va Sochida Suriya bo‘yicha o‘tgan sammit natijalarini muhokama qilishgan. 

Ma'lum qilinishicha, Ruhoniy va Asad o‘zaro munosabatlarning rivojlanishidan mamnuniyat bildirishgan va barcha darajalarda hamkorlikni davom ettirishga kelishib olishgan.

“Ruhoniy Tehron Suriyaga terrorchilikka qarshi kurashni yakunlash va mamlakatni tiklash uchun barcha zarur vositalarni yetkazishni davom ettirishini ta'kidlab o‘tgan”, deyilgan xabarda.

O‘z navbatida Asad Ruhoniy va Eron xalqiga Suriyaning qonuniy hukumatini qo‘llab-quvvatlayotganlik uchun minnatdorlik bildirgan.

Asad, shuningdek, Tehronda Eronning oliy diniy yetakchisi oyatulloh Ali Homanaiy bilan uchrashgan.

Uchrashuv davomida Homanaiy Asadni Suriya armiyasi g‘alabasi bilan tabriklagan. “Bu g‘alabalar G‘arb va AQShning mintaqadagi rejalariga hal qiluvchi zarba berdi”, deb aytgan Homanaiy.

Tomonlar bir qator g‘arb davlatlarining mintaqada, ayniqsa Suriya va Eronda tartibsizlik avj oldirishga urinishlariga qarshi kurashishni davom ettirish istagida ekanliklarini ta'kidlab o‘tishgan.