DXX giyohvand moddalar savdosiga chek qo‘ydi

Mamlakatda huquq-tartibot idoralari tomonidan giyohvand moddalar savdosiga qarshi kurash borasida tizimli ishlar amalga oshirilmoqda.

Davlat xavfsizlik xizmati Toshkent viloyati boshqarmasi xodimlari tomonidan o‘zbek-tojik davlat chegarasini noqonuniy kesib o‘tgan vaqtda 1978 yilda tug‘ilgan, Tojikiston Respublikasi fuqarosi, So‘g‘d viloyati Mastchox tumani Fotixobod posyolkasida yashovchi M.M. ushlandi. Uning qo‘l yuklari ko‘zdan kechirilganda sof og‘irligi 773 gr. bo‘lgan opiy moddasi borligi aniqlandi va tegishli tartibda rasmiylashtirildi.

Shuningdek, Toshkent tumani “Shodlik” ko‘chasida yashovchi, 1980 yilda tug‘ilgan Sh.Z. va uning onasi Z.N. ham huquqni muhofaza qiluvchi organ xodimlarida shubha uyg‘otdi va dastlab ular yashaydigan xonadon kuzatuvga olindi. Videonazorat xonadon oynasidan shubhali narsa uloqtirilganligini tasvirga tushiradi. Shundan so‘ng tekshiruv harakatlari davom ettirilib, natijada ushbu uloqtirilgan shubhali narsa ichida salkam 3 kg. marixuana giyohvand moddasi aniqlandi va tegishli tartibda rasmiylashtiriladi.

Navbatdagi giyohvand moddalar savdosi bilan bog‘liq holat Davlat xavfsizlik xizmati Qashqadaryo viloyati boshqarmasi xodimlari tomonidan aniqlandi. 1989 yil Chiroqchi tumanida tug‘ilgan H.B. “Lasetti” avtomashinasida Toshkent shahriga yo‘l oladi. Avtomashina “Umakay” yo‘l patrul xizmati maskanida ko‘zdan kechirilganida 120 gr. marixuana vositasi borligi aniqlandi. Surishtiruv davomida H.B. uni Toshkent shahriga olib borib sotmoqchi bo‘lganligi ma'lum bo‘ldi. Tezkor guruh tomonidan H.B.ning yashash manzili ham ko‘zdan kechirilganda uyning yerto‘lasidan 5 kg. 294 gr. marixuana giyohvandlik vositasi rasmiylashtirib olindi.

Bundan tashqari, Davlat xavfsizlik xizmati Farg‘ona viloyati boshqarmasi xodimlari tomonidan O‘zbekiston Respublikasiga kontrabanda yo‘li bilan olib kelingan gashish giyohvand moddasi savdosiga chek qo‘yildi.

Bir muddat avval geroin savdosi bilan ushlangan fuqaro M.M.ning ko‘rsatmasiga ko‘ra, qirg‘izistonlik H. ismli shaxs gashish moddasini O‘zbekistonga olib o‘tib, belgilangan joyga yashirib ketganligi ma'lum bo‘ldi. O‘tkazilgan tekshiruv natijasida Qirg‘iziston Respublikasiga chegaradosh bo‘lgan Quvasoy shahar Polvon mahallasidagi dala shiyponi devori ostidan qora sellofan paket ichida 10 dona alohida bo‘laklarda bo‘lgan sof og‘irligi 7 kg. 662 gr. Miqdordagi gashish giyohvand moddasi ashyoviy dalil sifatida olindi.

Hozirda barcha holatlar yuzasidan O‘zbekiston Respublikasi JKning tegishli moddalariga asosan jinoyat ishlari qo‘zg‘atilib, tergov harakatlari olib borilmoqda.