Londonda derbi, Ispaniyada el-klasiko. Hafta o‘yinlari anonsi

Bu hafta yevrokuboklar «dam olayotgan» bo‘lsa ham, futbol ixlosmandlari uchun bugun haqiqiy futbol bayrami bo‘ladi. Ta'bga qarab, istasangiz London derbisi, Angliya grandlarining chempionlik kurashidagi sirtqi raqobati yoki masalan, Ispaniya tomonga nazar tashlab, dunyoning eng katta o‘yini – El Klasikoni tomosha qilish imkoniyatiga egasiz.

«Kristal Pelas» – «Manchester Yunayted»
27 fevral, soat 23:00da, London, «Selxers Park» stadioni (Toshkent vaqti bilan soat 01:00)

Bu o‘yin turnir jadvalida kuchli to‘rtlik uchun kurash nuqtai nazaridan ham ahamiyatli, Sulsherning jamoani tushib qolgan og‘ir ahvoldan qanday olib chiqib keta olishini ko‘rish ham qiziq bo‘lsa kerak. Atigi uch kun oldin «Liverpul»ga qarshi o‘yin davomida «MYu»ning to‘rt futbolchisi jarohat oldi. Marsiyal, Jons va Matich sal oldinroq safdan chiqqani, Valensiya, Darmiyan kabi futbolchilar esa, hali tiklanib ulgurmaganini ham hisobga olsak, Sulsher deyarli bir o‘yinga yetadigan tarkibdan foydalana olmaydi. Bunday holatda, murabbiy qanday yo‘l topishini kuzatamiz, zero endi har bir o‘yinda ochkolar suv va havodek zarur.

«Kristal Pelas» esa, o‘ziga yarasha xavfli jamoa, ayniqsa, o‘z maydonida. «Manchester Yunayted» bilan o‘zaro statistika u qadar umidli bo‘lmasada (1992 yildan beri APLda «Kristal Pelas» bu raqibni yenga olmagan), aksariyat o‘yinlarda «burgutlar» munosib qarshilik ko‘rsata olishgan. Xususan, birinchi davrada «Old Trafford»da ham mezbonlar raqib darvozasiga yo‘l topa olishmagandi. Nafaqat himoyada, «Kristal Pelas»ning oldingi chizig‘ida ham ancha tajribali, muhimi, top-jamoalarda to‘p surib ulgurgan futbolchilar to‘p suradi. Taunsend o‘z vaqtida «Tottenhem»ning, Benteke «Liverpul», Bashuayi «Chelsi»ning libosini kiyib ulgurgan. Uilfrid Zaa esa «Manchester Yunayted» tarbiyalanuvchisi hisoblanadi.  

Yana bir qiziq seriya, «Manchester Yunayted» Ole Gunnar Sulsher kelganidan beri, safarda o‘tkazgan 7 o‘yinning barchasida g‘alaba qozondi. Bu g‘alabalarning 4tasi Londonda, «Arsenal», «Tottenhem», «Chelsi» va «Fulhem» ustidan qozonilganini ham ta'kidlash kerak. Demak, o‘ziga xos London zabt etuvchisiga aylangan Sulsher beshinchi g‘alabasi uchun yana sevimli shahriga qaytmoqda.

«Chelsi» – «Tottenhem»
27 fevral, soat 23:00da, London, «Stemford Brij» stadioni (Toshkent vaqti bilan soat 01:00)

London derbisi. El Klasikoga monandroq top-o‘yin kerak bo‘lsa, bu o‘yinga ham e'tibor qaratish mumkin. Ispaniya grandlari kabi o‘ta yuqori saviya bo‘lmas, ammo shiddatli kurash va keskinlik borasida qolishmaydi. Ayniqsa, «Chelsi» ichkarisida bo‘layotgan hodisalar, Sarri va futbolchilar o‘rtasidagi ziddiyatlar jamoaning har bir o‘yiniga alohida diqqat qilishni taqozo etadi. Chempionlar Ligasidagi o‘rinlar uchun raqobat bo‘yicha ham olti ochkolik bahs.

«Tottenhem» chempionlik poygasiga yaqinlashib, yana kimdirlar jamoaning sovrin uchun imkoniyatlarini chamalay boshladi hamki, Pochettino shogirdlari yana bosimni yenga olmadilar. Harri Keyn, Alli kabi yetakchilarsiz, o‘ta qiyin vaziyatlarda, so‘nggi daqiqalarda irodali g‘alabalarni qo‘lga kiritish boshqa, ammo aynan chempionlik darajasida o‘ynab, o‘z ochkolarini qoldirmay yig‘ib olish talab etilganda, londonliklarda muammolar yuzaga keladi. Keynning safga qaytgan ilk o‘yini mag‘lubiyat bilan tugadi – «Byornli» maydonida «Tottenhem» qimmatli ochkolarni yo‘qotdi.

Endi esa, pastdagi uch jamoaga ko‘proq e'tibor berishga to‘g‘ri keladi. «Tottenhem» keyingi turda «Arsenal» bilan ham o‘ynashini hisobga olsak, «Tottenhem»ga qiyin palla boshlanmoqda. Jamoa kelayotgan ikki o‘yinni boy bersa, 5-o‘ringa ham yaqinlashib qolishi shubhasiz.

Tarkiblar borasida «Tottenhem» hamon Dele Alli va Erik Dayyersiz qolmoqda. «Chelsi» tarkibida esa, deyarli barcha futbolchilar uchrashuvga tayyor. Faqat ular Sarri uchun bor imkoniyatlarini ishga soladilarmi, masala shu. Shuningdek, «Tottenhem» oxirgi o‘yinini shanba kuni o‘tkazganini, «Chelsi» esa, bir kun keyin, Angliya Liga kubogi finalida 120 daqiqa harakat qilganini ham aytib o‘tish lozim.

«Liverpul» – «Uotford»
27 fevral, soat 23:00da, Liverpul, «Enfild» stadioni (Toshkent vaqti bilan soat 01:00)

«Liverpul»ni 2019 yilda tanib bo‘lmayapti. To‘g‘ri, aslida Klopp jamoasi mavsum boshidan ancha pragmatik va himoyaviy o‘ynay boshlagandi, ammo hujum chizig‘idagi muammolar aynan yangi yilda ko‘proq ko‘zga tashlanyapti. Mavsum oxiri yaqinlashgan sari ochko yo‘qotishdan qo‘rqish, bosim, ehtiyot bo‘lib o‘ynashga bo‘lgan intilish «Liverpul»ning dahshatli, hammani vahimaga soladigan hujum chizig‘i haqidagi tasavvurlarni tarqatib yubordi.

«Liverpul» 2019 yildagi 9 o‘yindan atigi 3tasida g‘alaba qozondi va bu g‘alabalarning faqat bittasi – o‘z maydonida «Bornmut»ga qarshi o‘yin ancha ishonchli chiqqandi. «Liverpul» oxirgi besh o‘yinning to‘rttasida durang qayd etdi va atigi beshta gol urdi. «Bavariya» va «Manchester Yunayted»ga qarshi kechgan oxirgi ikki o‘yin ham 0:0 hisobida yakunlandi, bu o‘yinlarda «Liverpul» atigi uch marta darvozalarga aniq zarba bera oldi xolos. Bunday holatda ruhiy jihatdan navbatdagi raqibga tayyorlanish va g‘alaba qozonishni shunchaki, navbatdagi vazifa sifatida qabul qilish juda qiyin bo‘lishi tabiiy. Ammo boshqa yo‘l yo‘q – chempion bo‘lish uchun endi qolgan hamma o‘yinda g‘alaba uchun kurashish kerak.

«Liverpul» odatda «Uotford» bilan uy o‘yinlarini juda ishonchli o‘tkazgani mezbonlarga umid beradi – oxirgi ikki o‘yin 5:0 va 6:1 hisobidagi g‘alabalar bilan yakunlangan. Lekin «Uotford» so‘nggi o‘yinlarni ancha barqaror o‘tkazmoqda. Jamoa oxirgi uch o‘yinni o‘z foydasiga hal qildi. Umuman, oxirgi 16 o‘yinda «Uotford» atigi 3 marta mag‘lubiyatga uchradi va bu mag‘lubiyatlar ham «Siti», «Chelsi» va «Tottenhem»ga qarshi o‘yinlarda bo‘ldi. Oddiy, kuchlar teng bo‘lgan o‘yinlarda «Uotford» mag‘lubiyatga uchramagan. Xulosa qilish mumkinki, «Liverpul» agar bugun uch ochko olishni istasa, top-klublarga xos o‘yin ko‘rsatishi shart. 

«Manchester Siti» – «Vest Hem»
27 fevral, soat 23:00da, Manchester, «Etihad stedium» stadioni (Toshkent vaqti bilan soat 01:00)

«Liverpul»dan farqli ravishda, «Manchester Siti» aynan mavsumning ikkinchi yarmiga kelib, o‘z o‘yinini kuchaytirishga erishdi va endi bosim ko‘proq mersisaydliklarga o‘tdi. Yaqindagina peshqadam bilan oradagi farq 7 ochkogacha yetgandi, hozir esa, atigi 1 ochko. Bunday holatda, «Manchester Siti» yanada o‘ziga ishonchini orttirishi va ta'qibni davom ettirishi mumkin. Buning uchun esa, albatta, «Vest Hem»ni ham yutish shart.

«Vest Hem» tarkib, murabbiylar shtabi borasida juda salobatli ko‘rinsa-da, bu mavsumni ham ancha beqaror o‘tkazmoqda va juda chiroyli, sermahsul o‘yinlar ba'zida muvaffaqiyatsizliklar bilan ham almashib turibdi. Yetti o‘yindan beri «shaharliklar»ga qarshi o‘yinlarda hatto durangga ham erisha olmayotgan «Vest Hem» uchun balki aynan shu safar qo‘shimcha imkoniyat ochilishi mumkin. Birinchidan, yuqoridagi bo‘limda ham aytilganidek, «Manchester Siti» raqibidan bir kun kam dam oldi va final o‘yini 120 daqiqaga cho‘zildi. Ikkinchidan esa, «Vest Hem» murabbiyi Manuel Pellegrini o‘z vaqtida «Manchester Siti»ni boshqarganini va Gvardiola aynan uning o‘rniga tashrif buyurganini ham unutmaslik lozim.

Tiklanishdan tashqari, jarohatlar bobida ham Gvardiolada boshog‘riqlar yetarli. Stounzga qo‘shilib, endi Emerik Laporte ham jarohat oldi va bugun maydonga tusha olmaydi. Markaziy himoyachilar o‘rnini qisman qoplash mumkindir, ammo Fernandinoning ham bir oyga safdan chiqqani «Manchester Siti»ga kattaroq muammolarni keltirib chiqarishi tabiiy. Chunki braziliyalik yarimhimoyachi maydon markazidagi ish ko‘lami bo‘yicha tarkibning asosiy vakillaridan biri edi. Uning o‘rnini to‘ldirish murabbiy uchun qiyinchilik tug‘diradi.  

«Real» – «Barselona»
27 fevral, soat 23:00da, Madrid, «Santyago Bernabeu» stadioni (Toshkent vaqti bilan soat 01:00)

Bu hafta «Real» va «Barselona» ikki marta «Santyago Bernabeu»da to‘qnash keladi. O‘yin ahamiyati, strategik jihatidan bugungi uchrashuv muhimroq ekani tabiiy.

Chunki La Ligada jamoalar orasidagi farq hamon 9 ochkoligicha saqlanib turibdi va chempionat doirasidagi g‘alaba madridliklarga sezilarli imkoniyat taqdim etmaydi. Baribir barcha masala «Barselona»ning qo‘lida qoladi. Bugungi uchrashuvga esa sovrin tikilgan va «Real»da raqibini ortda qoldirish uchun yaxshigina imkoniyat bor. «Kamp Nou»dagi 1:1 hisobida bugungi mezbonlarning imkoniyatlarini sal oshiradi va har qanday hisobdagi g‘alaba yoki golsiz durang «Real»ni finalga olib chiqadi. O‘sha o‘yindan farqli ravishda, endi, Lionel Messi yana sport formasiga qaytganini ta'kidlash kerak. Ikki hafta oldin kichik jarohat tufayli faqat ikkinchi bo‘limda maydonga tushgan sardor hozir juda yaxshi holatda, xususan «Sevilya»ga qarshi o‘yindagi het-trik ham buni isbotlab turibdi.

Bu juftlik g‘olibi yakunda Ispaniya kubogini qo‘lga kiritishiga ko‘pchilik shubha qilmasa kerak. Narigi juftlikdagi «Valensiya» va «Betis»ning imkoniyatlari pastroq baholanadi.

Jamoalar bu musobaqada oxirgi marta to‘rt yil oldin finalda uchrashgandi va o‘shanda madridliklar 2:1 hisobida g‘alaba qozonishgan. Keyingi yillarda Ispaniya kubogida bu jamoalar to‘qnash kelmayotgandi va bu davrda «Barselona» to‘rt marta kubokni o‘ziniki qilgan. Endi esa, yana «Real» qarshiligini sindirish talab etiladi.

Tarkiblar borasida «Real» safida Isko maydonga tusha olmaydi. Shuningdek, Lorente aynan «Barselona»ga qarshi ilk o‘yinda jarohat olib maydonni tark etgandi. Mehmonlardan esa, so‘nggi o‘yinlarda jarohat olgan Arturning holati so‘roq ostida. Ammo u ham mashg‘ulotlarda qatnashyapti va balki kerak bo‘lganda maydonga tushishi ham mumkin.