Moliya vazirligi Jizzax viloyatidagi har bir tumanga 4 mlrd so‘mdan mablag‘ ajratadi

Vazirlar Mahkamasi O‘zbekiston Respublikasi Prezidentining 2019 yil 30-31 yanvar kunlari Jizzax viloyatiga tashrifi davomida berilgan topshiriqlar ijrosini ta'minlash hamda Jizzax viloyatining tumanlari markazlarida qurilish va obodonlashtirish ishlarini jadal sur'atlarda tashkil etish maqsadida farmoyish qabul qildi.

Hujjat bilan O‘zbekiston Respublikasi Moliya vazirligi Jizzax viloyatining barcha tumanlari (Mirzacho‘l tumanidan tashqari) markazlarini zamonaviy qiyofaga keltirish uchun ijtimoiy soha muassasalarini ta'mirlash va aholini toza ichimlik suvi bilan ta'minlash ishlariga har bir tumanga 4 mlrd so‘mdan, jami 44 mlrd so‘m mablag‘ni Jizzax viloyati mahalliy budjetiga ajratilishini ta'minlaydi.

Bunda, ushbu ko‘rsatib o‘tilgan mablag‘lar:

respublika budjetining yil boshidagi erkin qoldiq mablag‘lari hisobidan har bir tumanga 2 mlrd so‘mdan, jami 22 mlrd so‘m mablag‘ 2019 yil fevral oyi mobaynida;

respublika budjetining birinchi chorakdagi daromadlari rejasining oshirib bajarilgan qismi hisobidan har bir tumanga qo‘shimcha 2 mlrd so‘mdan, jami 22 mlrd so‘m mablag‘ 2019 yil aprel oyi mobaynida ajratilishi ta'minlanadi.

Jizzax viloyatining tumanlari markazlarida bajariladigan qurilish va obodonlashtirish ishlari bo‘yicha:

Jizzax viloyati hokimligi huzuridagi “Yagona buyurtmachi xizmati” IK” davlat unitar korxonasini - buyurtmachi etib;

eng maqbul takliflarni tanlab olish asosida aniqlangan loyihalovchi va pudratchi tashkilotlar - bosh loyihalovchi va bosh pudratchi tashkilotlar etib belgilanadi.

Bosh loyihalovchi va bosh pudratchi tashkilotlarni tanlab olish jarayonlarini nazorat qilish va natijadorlikni ta'minlash yuzasidan shaxsiy javobgarlik Jizzax viloyati xokimi E.Saliyev zimmasiga yuklandi.

O‘zbekiston Respublikasi Investitsiyalar va tashqi savdo vazirligi, Moliya vazirligi, Iqtisodiyot va sanoat vazirligi, Xalq ta'limi vazirligi, Sog‘liqni saqlash vazirligi va Jizzax viloyati hokimligi O‘zbekiston Respublikasining 2019 yilga mo‘ljallangan Investitsiya dasturiga qo‘shimcha ravishda quyidagi obektlar belgilangan tartibda kiritilishini ta'minlaydilar:

Forish tumanida 60 o‘rinli tug‘ruqxona kompleksini qurish va jihozlash;

Do‘stlik tumani “Yangi hayot” massivida 630 o‘rinli umumta'lim maktabini qurish va jihozlash;

Jizzax viloyati hokimligi va O‘zbekiston Respublikasi Xalq ta'limi vazirligi takliflari asosida viloyatdagi eng og‘ir ahvolda bo‘lgan umumta'lim maktablarini ta'mirlash.

O‘zbekiston Respublikasi Moliya vazirligi O‘zbekiston Respublikasining 2019 yilga mo‘ljallangan Investitsiya dasturiga qo‘shimcha ravishda kiritiladigan, mazkur farmoyishda nazarda tutilgan obektlarni moliyalashtirish uchun respublika budjetining qo‘shimcha manbalari hisobidan belgilangan tartibda mablag‘lar ajratilishini ta'minlaydi.

Jizzax viloyati hokimligi mazkur farmoyish bilan O‘zbekiston Respublikasining 2019 yilga mo‘ljallangan Investitsiya dasturiga qo‘shimcha kiritilgan obektlarning loyiha-smeta hujjatlarini bir oy muddatda ishlab chiqilishini ta'minlaydi.

O‘zbekiston Respublikasi Qurilish vazirligi mazkur farmoyish bilan O‘zbekiston Respublikasining 2019 yilga mo‘ljallangan Investitsiya dasturiga qo‘shimcha kiritilgan obektlarning loyiha-smeta hujjatlari davlat ekspertizasidan o‘tkazilishini va qurilish-montaj ishlarini bajarishda sifat talablariga rioya etilishi yuzasidan tegishli davlat arxitektura-qurilish nazoratini ta'minlaydi.